Ekspert: "Şimali Qafqaz istənilən an alovlana bilər"

Xəbər verdiyimniz kimi dünən gecədən başlayaraq Çeçenistanın paytaxtı Qroznıda ağır döyüşlər gedir.

Son zamanlar Şimali Qafqazda bəzi qüvvələrin yenidən fəallaşmasını və Şimali Qafqazda baş verən hadisələri, onların Azərbaycana mümkün təsirlərini hərbi ekspert Üzeyir Cəfərov Ölkə.az-a şərh etdi.

Üzeyir Cəfərov: "Bir müddətdir ki, Şimali Qafqaz diqqətdən kənarda qalmışdı. Ancaq orada çox ciddi gizli prosseslər gedirdi, baxmayaraq ki, zahirən hər şey çox yaxşı, sakit görsənirdi. Təhlillərimə və aldığım məlumatlara görə, yaxın zamanlarda Şimali Qafqaz Rusiyanın baş ağrısına çevriləcək. Rusiyanın atdığı bəzi yalnış addımlara, Çeçenistan prezidenti Ramzan Kadirovun yersiz bəyanatlarına, hədələrinə görə, böyük güclər çalışacaq ki, bəzi qüvvələri hərəkətə gətirsinlər.

Şimali Qafqazda narazı insanlar çoxdur. İstənilən an ora alovlana bilər. 2015-ci ildə Rusiyanı iqtisadi, maliyyə problemlərindən çox etnik münaqişələrin qızışması sarsıdacaq. İstisna etmirəm ki, Şimali Qafqaz çox böyük narahatçılıq meydanına çevrləcək. Bunun işartıları artıq görünür.

Rusiyada son illər Çeçenistan və Dağıstan barədə arxayınçılıq var idi ki, orda sakitçilik yaranıb, amma sakitçilik zahiri görünüş idi, daxildə çox ciddi proseslər gedirdi. 2015-ci ildə bunlar özünü tam, açıq şəkildə göstərəcək.

Şimali Qafqazda baş verənlərin Azərbaycana da hər zaman təsiri ola bilər. Bu bizim sərhədlərimizdə baş verən prosseslərdir. Biz bunu diqqətdən qaçıra bilmərik, qaçırmamalıyıq da. Azərbaycan tərəfi lazımi addımları atmalıdır və atır da. Sabah orada gərginlik yaransa, əvvəlki illərdə olduğu kimi bəzi insanlar Azərbaycan ərazisinə keçməyə çalışacaqlar. Adımız yenə də lazım olmayan yerlərdə hallanacaq ki, guya biz terrorçulara dəstək veririk. Əslinə qalsa terrorçulara ən böyük dəstəyi elə Rusiyanın özü verir. Rusiya erməni separatçılarının, terrorçularının arxasındadır. Ukrayna hadisələrindən sonra təkcə Şimali Qafqaz yox, Rusiyanın digər bölgələrində də açıq şəkildə görəcəyik ki, bəzi qüvvələr baş qaldıracaq və Rusiyanın indiki hakimiyyətini devirmək üçün hərəkətə gələcəklər".

Səxavət Məməd
Ölkə.az