Siyasətçilər və millət vəkilləri “Qarabağ”ı belə təbrik etdilər

“Ölkə.Az”-ın məlumatına görə, onlar “Qarabağ”ın bu qələbəsini tarixi nəailiyyət adlandırıblar. 

Azərbaycan Milli İstiqlal Partiyasının qurucusu və ilk sədri Etibar Məmmədov bildirib ki, “Qarabağ” komandasının Çempionlar Liqasının qrup mərhələsinə vəsiqə qazanması çox böyük hadisədir:

“Bu, Azərbaycan futbolunun inkişaf səviyyəsinin artıq Avropaya çatmasını göstərir. Hamı kimi mən də bu münasibətlə xalqımızı, xüsusilə də komandanın baş məşqçisi Qurban Qurbanovu və futbolçuları təbrik edirəm. Qurban Qurbanov Azərbaycanın son illər yetişdirdiyi görkəmli şəxsiyyətlərdən birinə çevrilib. Yəni, Qurban Qurbanov Azərbaycana qələbə gətirən bir simvol kimi xatırlanır”. 

E.Məmmədov futbolla da çox maraqlandığını söyləyib:

“Futbolu izləməyi də sevirəm. Yəqin ki, “Qarabağ”ın növbəti oyunlarını stadiondan da izləyəcəm. Mən “Qarabağ” klubuna növbəti oyunlarda qələbə arzu edirəm”.  

Milli Məclisin Dağlıq Qarabağdan seçilmiş deputatı, Qarabağ müharibəsi veteranı Elman Məmmədov deyib ki, bu, Azərbaycan xalqının və idmanının qələbəsidir:

“Hər birimiz bu qələbəni çoxdan arzulayırdıq. “Qarabağ” komandasının bu qələbəsi bizdə ruh yüksəkliyini daha da artırdı. Bu qələbə həm də son 20 ildə Azərbaycan idmanını dünyaya tanıdan Prezident İlham Əliyevin qələbəsidir. Mən bu qələbəni yaşaya-yaşaya ürəyimdən keçən əsas arzumu söyləmək istəyirəm. Arzum odur ki, kaş Azərbaycan ordusu da qələbə çalıb işğal altında olan torpaqlarımızı azad edəydi və bununla da qələbə qələbəyə qarışaydı. İnanıram ki, o qələbəmiz da yaxınlaşır”. 

Deputat qeyd edib ki, ümumiyyətlə, Qarabağla bağlı nə varsa, hamısı bizə məxsudur: 

“Qoy bütün dünya görsün ki, “Qarabağ” Azərbaycana aid olan addır. Bunu bütün dünya bir daha gördü. Qarabağ Azərbaycan deməkdir. Bu gün “Qarabağ” komandası qələbə qazandı, sabah isə Qarabağda Azərbaycan ordusu qələbə çalacaq. Bunu bütün xalqımız səbrsizliklə gözləyir. Mən bu münasibətlə bütün xalqımızı təbrik edirəm. İnşallah bu uğurlarımız ümumxalq qələbəsinə çevriləcək və bununla Azərbaycan ordusu düşmən üzərində qələbə qazanacaq”. 

Milli Məclisin digər deputatı, Böyük Quruluş Partiyasının sədri Fazil Mustafa da “Qarabağ” komandasını təbrik edib:

“Bu millətə bu qələbə hava, su kimi lazım idi. Bizi sevindirən qəhrəmanlarımıza eşq olsun! Qurban Qurbanov – Azərbaycanın böyük oğlu! Sənin rəhbərliyində Qarabağ adı dünya futbolunun ana səhifəsinə yazıldı. Bu dəfə qarşınızı ala bilmədilər. Demək ki, qalib gəlməyi bacarırıq. Sadəcə, düzgün təşkilatlanmaq lazımdır. Mobil, doğru təşkilatlanmış bir komanda inanılmazı bacardı! Abdulbarı Gözələ, Tahir Gözələ təşəkkürlər! Azərbaycan üçün ən böyük işi gördünüz! Bu sadəcə futbol meydançasında qazanılan qələbə deyil! Bu həm də siyasi qələbədir. İnşallah millət olaraq, dövlət olaraq hərbi qələbəmizi də gerçəkləşdirərik. Allah sizləri qorusun, fədakar “Qarabağ” komandası!”.
 
Müsavat partiyasının başqanı Arif Hacılı da “Qarabağ” futbol komandasına uğurlar arzu etdiyini söyləyib:

“Artıq Çempionlar Liqasının qrup mərhələsindəyik. Təbriklər Qarabağ! Təbriklər Azərbaycan!”.

Milli Məclisin xanım deputatı Qənirə Paşayeva qələbə münasibəti ilə komandanın baş məşqçisi Qurban Qurbanovla telefonla danışdığını və onu təbrik etdiyini bildirib:

“Bir az əvvəl tarix yazan “Qarabağ” futbol klubumuzun baş məşqçisi, əziz qardaşım Qurban Qurbanovla danışdım və həm öz adından həm də insanlarımız adından onu təbrik etdim. Qurban Qurbanov Azərbaycan futbolunun inkişafında misilsiz xidmətlərin müəllifidir. Özünün biliyi,bacarığını oyunculara öyrətmək, klubun inkişafına təkan verməklə yanaşı özünün mənəvi-əxlaqi keyfiyyətləri ilə də bütün oyunçular üçün ən gözəl örnəkdir. Bir az əvvəl özünə də dediyim kimi dünən axşam bütün azərbaycanlılar duaları ilə onların yanında idi və hər zaman da olacaq. “Qarabağ” öz ətrafında bütün azərbaycanlıları birləşdirən bir klubdur”.

Q.Paşayeva “Qarabağ” futbol klubunun prezidenti Tahir Gözəllə də danışdığını bildirib:

“Onu və bütün klubu təbrik edərkən söylədim ki, “Qarabağ”ın qələbəsi bütün Azərbaycanın, azərbaycanlıların qələbəsidir və komandanın rəhbərliyinə də təşəkkürümü bildirdim. “Qarabağ” dünən axşam tarixi bir mərhələni adladı və ən güclü klubların yarışacağı mərhələyə daxil oldu. “Qarabağ” ölkəmizin təbliğatı baxımından da misilsiz işlər görür. “Qarabağ” klubunun rəhbərləri Abdulvarı Gözəl, Tahir Gözəli, Baş məşqçi Qurban Qurbanovu, bütün oyunçuları və komandaya əziyyət çəkən hər kəsi, klubu xüsusi diqqətdə saxlayan cənab Prezidenti və klubun azarkeşləri olan bütün azərbaycanlıları təbrik edirəm! Eyni zamanda “Qarabağ” futbol klubunun yaradılmasında, bu günə qədər inkişafında əməyi ola hər kəsi təbrik edirəm. Bundan sonra “Qarabağ”ın yanında daha da çox olmalıyıq. Ümid edirəm ki Qurban müəllimin açıqladığı məsələ kluba bir neçə əlavə yaxşı oyunçunun cəlb edilməsi də öz həllini tapacaq və komanda növbəti mərhələdə uğurları ilə yenə də hamımızı sevindirəcək”.

Xatırladaq ki, avqustun 23-də “Qarabağ” futbol klubu səfərdə “Kopenhagen” komandasına 2:1 hesabı ilə məğlub olsa da, Bakıda ilk oyunda qazanılmış minimal qələbə sayəsində Azərbaycan futbolu tarixində ilk dəfə Çempionlar Liqasının qrup mərhələsinə vəsiqə qazanıb.

Vasif Həsənli
Ölkə.Az