\"Minsk qrupunun həmsədrləri birgə bəyanatla çıxış etmədikcə, vəziyyət dəyişilməz olaraq da qalacaq\"

Riçard Hoqland bildirib ki, Keçmiş Dağlıq Qarabağ muxtar vilayətinin rəsmi Bakının nəzarət etmədiyi ərazisinə müvəqqəti status verilməlidir, bu status ən azından təhlükəsizliyi və muxtariyyətin təminatını təmin etməlidir. Bundan əlavə Minsk qrupunun həmsədri qeyd edib ki, bütün məcburi köçkün və qaçqınların öz yaşayış yerlərinə geri qayıtma hüququnu tanınmalıdır.

Minsk Qrupunun amerikalı həmsədrinin bəyanatına politoloq İlqar Vəlizadə "Ölkə.Az"-da münasibət bildirib:

"Əslində Riçard Hoqlandın çıxışında yeni bir şey yoxdur. Bu ABŞ-ın rəsmi mövqeyinin təkrarıdır. Bunu başqa formada Ceyms Uorlik də demişdi. Bu açıqlamalar bu və ya digər şəkildə Madrid prinsiplərini təkrarlayır. Madird prinsipində də rayonların boşaldılması göstərilib, Dağlıq Qarabağa müvəqqəti statusun verilməsi haqqında danışılıb. Çox maraqlıdır ki, Madrid prinsiplərinin ərsəyə gəlməsində erməni tərəfinin də böyük rolu olub çünki o prinsiplər erməni tərəfi ilə bir yerdə hazırlanıb. Ona görə də, bu mövqe demək olar ki, Minsk qrupu tərəfindən dəstəklənən mövqedir. Sadəcə olaraq ABŞ tərəfi Dağlıq Qarabağ problemi barədə konkret danışır, digərləri isə susur. Bu onu göstərir ki, ABŞ digərlərinə - Rusiya və Fransaya baxmış daha obyektiv mövqedə dayanır.

ABŞ-ın mövqeyini açıqlayır, ancaq əməli bir iş görülübmü? Məsələ budur. Əslində neçə illərdir ki, ermənilərə təzyiq gözləyirik. ABŞ-ın bu cür bəyanatla çıxış etməsi erməni tərəfinə xatırlatmaqdır ki, vaxtilə belə bir prinsiplər var idi, bunu siz də bəyənmişdiniz, gəlin buna əməl edin".

Minsk Qrupunun amerikalı həmsədrinin bu bəyanatdından sonra danışıqlarda hansısa irəlləyiş gözlənilirmi sualına isə politoloq belə cavab verdi:

"Təcrübə göstərir ki, bu tip açıqlamalardan sonra heç nə baş vermir. Ceyms Uorlik də buna bənzər bəyanat vermişdi və ondan sonra heç bir dəyişiklik olmamışdı. Çox güman ki, bu dəfə də olmayacaq. Bunun səbəbi isə Minsk qrupunun vahid mövqedən çıxış etməməsidir. Bu cür bəyanatla fransalı, rusiyalı həmsədrlər də bəyanat versəydilər, mənzərə başqa cür olardı. Nə qədər ki, Minsk qrupunun həmsdərləri birgə bəyanatla çıxış etməyəcəklər, vəziyyət dəyişilməz olaraq da qalacaq".

Səxavət Məmməd
Ölkə.Az