Söyüd ağaclarını məhv edən şirkət 4 min manat cərimələndi

Təbiətə vurduğu ziyana görə "Binagadi Oil Company" 4000 manat cərimə edilib.

Ekologiya və Təbii Sərvətlər Nazirliyinin mətbuat xidmətindən "Ölkə.Az"a verilən məlumata görə, təbiətə dəymiş ziyana görə, Abşeron rayonu Mehdiabad qəsəbəsi, Gənclər şəhərciyi ərazisində yaşıllığın məhv edilməsi ilə bağlı daxil olan şikayət Nazirliyin yerli qurumunun əməkdaşları tərəfindən yerində araşdırılıb.

Əraziyə keçirilən baxış zamanı Gənclər şəhərciyindəki yaşayış binasının qarşısındakı torpaq sahəsinin tikinti məqsədi ilə hasara alındığı, yaş köküstə 4 ədəd söyüd ağacının kökündən çıxarıldığı və 2 ədəd söyüd ağacının zədələndiyi məlum olub.

Araşdırma zamanı sözügedən ərazinin "Binagadi Oil Company" Şirkəti tərəfindən hasara alındığı aşkar edilib.

Faktla bağlı işin icrasına cavabdeh olan "Binagadi Oil Company" Şirkətinin nümayəndəsi Rauf Bayramov barəsində protokol tərtib olunub. Qanun pozucusu inzibati qaydada 4000 manat məbləğində cərimə edilib və təbiətə dəymiş ziyana görə 480 manat məbləğində ziyan tətbiq olunub. Yol verilmiş qanun pozuntusunun aradan qaldırılması üçün "Binagadi Oil Company" Şirkətinə icrası məcburi olan müddətli "məcburi göstəriş" verilib.

Eyni zamanda tikintinin dayandırılması üçün Abşeron rayon Polis İdarəsinə və "Binagadi Oil Company" Şirkətinə müraciət olunub.