Arakanda dəhşət
"Ölkə.Az" xəbər verir ki, ordunun hücumu nəticəsində 3 minə yaxın müsəlman qətlə yetirilib. 100 min insan ev-eşiyindən didərgin düşüb. Bu barədə Avropa Rohingya Şurasının mətbuat katibi Anita Şaq məlumat verib.
Məlumata əsasən Arakanda son günlərdə müsəlmanlara qarşı baş verən qətliam 2012-ci ildə baş verən hadisələrdən daha qanlı olub. Arakanın Rathedaung şəhərinə aid Saugpara kəndində 900-1000 nəfər müsəlman qətlə yetirilib. Bu qətliamda sadəcə bir nəfər oğlan uşağı sağ qalıb.
Son üç gün ərzində Arakanın müxtəlif kəndlərində 3 minə yaxın müsəlman qətlə yetirilib.
100 min mülki vətəndaş ev-eşiyindən didərgin düşüb. 2 min arakanlı müsəlman Myanmar-Banqladeş sərhədinə yığılıb. Banqladeş hökuməti sərhədi bağlayıb.
Şaq qətliamın dayandırılması üçün BMT və bütün beynəlxalq ictimaiyyəti təcili surətdə hərəkətə keçməyə çağırıb.
Hikmət Həsənov
Ölkə.Az