Professor: "Dünya əhalisinin yarısı allergik xəstəliklərə məruz qalacaq"

Ümumdünya Səhiyyə Təşkilatının (ÜST) məlumatına görə, 2025-ci ilə dünya əhalisinin təxminən yarısı allergik xəstəliklərə məruz qalacaq.

Ölkə.Az xəbər verir ki, bunu Azərbaycan Tibb Universitetinin Uşaq xəstəlikləri kafedrasının professoru, tibb elmləri doktoru Hüseyn Qabulov deyib. O bildirib ki, hazırda dünyada ən çox yayılmış allergik xəstəliklərdən biri də qida allergiyasıdır:

“Bu növ allergiya dünya üzrə yetkinlərin 5 faizində və uşaqların 10 faizində baş verir”.

Professorun sözlərinə görə, allergiya ən çox inək südünə, ondan hazırlanan məhsullara qarşı yaranır:

“Xüsusilə bir yaşınadək olan uşaqlarda özünü göstərir. Bəlkə də təbiət tərəfindən elə qurulub ki, yenidoğulmuş dövrdə körpənin immun sistemi yalnız ana südünü qəbul edir və inək südünə kəskin reaksiya göstərir. Adətən körpələrin 80 faizində zaman keçdikcə inək südünə allergiya itir”.