\"Şoka düşdüm, məcbur qalıb qardaşıma dedim, içkili idim\"

“Adam bu xəbəri alanda, təbii ki, ilk 5-10 saniyə şoka düşür. Bütün beynin qarışır. Keçmişini, indiki halını, gələcəyinin necə olacağını, ailəni, yaxınlarını, sevdiklərini düşünürsən".

Ölkə.Az xəbər verir ki, bu sözləri "QİÇS: Mən həyatı seçirəm" sənədli filmində HİV virusu ilə mübarizə aparan Zaur adlı gənc söyləyib. 

O deyib ki, xəstəliyi haqqında məlumatı çox gec əldə edib: "Harada səhv etdiyini axtarırsan. Sonra fikirləşirsən ki, gərək olmayaydı, həyatın əldən getdi. Ən çox peşman olduğum, bildiyim halda, bu səhvə yol verməyim idi. Hansı ki qarşı tərəflə təmasda insan qorunmalıdır. Mən bunu eləmədim. Çünki içki qəbul etmişdim. Xəstəliyim haqqında məlumatı çox gec əldə etdim".

Zaur xəstəliyinin ilk simptomlarından bəhs edib: "Əvvəlcə qızdırma oldu. Ayaq üstə dayana bilmirdim. İştaham yox idi, heç nə yeyə bilmirdim. İlk vaxtlarda hədsiz dərəcədə dərman qəbul edirdim. Bədənimdə 2 milyona yaxın virus yüküm var idi. Bu, çox ciddi rəqəmdir. Bədəndə olan göbələk də çox idi. Bu da qaşıntılar verirdi. Ona görə gün ərzində həm qaraciyər, həm bədəndə olan göbələk, həm də qızdırma üçün ayrıca – təxminən 20-yə yaxın həblər qəbul edirdim. Ailəmdən gizli şəkildə müalicə alırdım. Məcbur qalıb qardaşıma dolayı yolla xəbər etdim. Yaxın dostlarımdan biri dedi. Bu xəstəliyi aşa bilsəm, immun sistemim güclənsə, planlarım çoxdur. Yenidən cəmiyyət içinə qayıdacağam, ixtisasım üzrə hazırlaşacağam və test imtahanında iştirak edəcəyəm. Bunu bilirəm ki, imtahandan da yüksək bal toplayıb, istədiyim vəzifəyə çatacağam. Bu səhvləri təkrarlamayacağam. Artıq hər şeydən özümü qorumaq məcburiyyətindəyəm".

Fidan
Ölkə.Az