Yayda uşaqlarda niyə qəbizlik yaranır?

Ölkə.Az xəbər verir ki, bu sözləri pediatr Aytən İsmayılzadə deyib. O bildirib ki, yayda uşaqların bədənindəki su tər və buxarlanma yolu ilə çıxdığından qəbizlik yaranır:

“Çünki uşaq yay aylarında daha çox qaçıb oynayır, tərləyir və bədəni quruyur. Ağızda quruluq hiss etmək bu o deməkdir ki, bədəndə susuzluq artıb. Bədəndəki susuzlaşma zamanı isə bağırsaqlar nəcis kütləsinin yumşalması üçün su buraxmır. Bu zaman su daha vacib orqanlar, əsasən də beyin toxuması üçün istifadə edilir. Çünki o düşünməlidir. Susuzlaşma nəticəsində insan komaya da düşə bilər. Beyin susuzlaşanda işləyə bilmir. Həmçinin artıq su zəhərlənməsi də beynin funksiyalarını poza bilir. Ona görə də körpə uşaqlara istədi istəmədi su vermək olmaz. Ana südü Onları su ilə təmin edir. Bu baxımdan biz analara körpə uşaqlara su verməyi məsləhət görmürük ki, su zəhərlənməsi olmasın.Amma yay aylarında körpə uşaqlar da daxil hər kəs sudan istifadə etməlidir ki, zəifləmə prosesi getməsin, qəbizlik yaranmasın”. 

Mütəxəssisin sözlərinə görə, valideynlərin digər narahatlığı yay aylarında uşaqların bezinin dolmaması ilə bağlıdır:

“Bu da tərləmənin, bədənin suyunun buxarlanmasının nəticsidir. Ona görə də biz uşağın maye tələbatını qarşılamalıyıq”.

Billurə Yunus