Uşaqlardakı bu əlamətlər qurdun yox, göbələyin göstəricisidir - FOTO

Ölkə.Az xəbər verir ki, bunu pediatr Aytən İsmayılzadə deyib. O bildirib ki, ombada qaşınma verən qurd - bizquyruq qurdu qarında ağrı vermir:

“Qarında ağrı verə bilən askarid qurdu isə ombada qaşınma vermir. Göbələk isə bağırsaq mühitində artarkən onun divarında iltihab yaradır, bu da qarında ağrı, ağızda pis qoxu, kakadan pis qoxu, anusətrafı qaşınma, qızartı verir. Anası körpə uşağı tualetdən sonra anası yuyanda bu zaman azyaşlı anus ətrafına toxunanda onda göynəmə olur deyə özünü çəkir. Bu da bağırsaq iltihabı mühitinin möhtəviyyatının anusətrafı dərini qıcıqlandırması ilə bağlıdır. Qurda görə hər ehtimal nəcisin ümumi analizini verə bilərsiniz”. 

Mütəxəssisin sözlərinə görə, bu zaman atılacaq əsas addım qida rasionunda karbohidrat və şəkəri azaltmaqdır:

“Çünki göbələk şəkərlə qidalanır. Makaron, çörək, şirinçay, şirniyyat, konfet və s. qidaları dayandırıb və əlamətlərə nəzarət etmək lazımdır. Azalırsa, demək ki, göbələk imiş. Bu zaman bir ay probiotik də verə bilərsiniz. Məsələn, “bifidum bakterin” ya da “lineks forte” ola bilər. Gündə bir-iki dəfə yemək vaxtı və ya yeməkdən birbaşa əvvəl verilməlidir ki, mədə turşuluğu bakteriyaları öldürməsin. Kandida ilə mübarizədə LGG bakteriyalar da yaxşıdır. “Acidolak”, aktiv flora kimi perparatlar da vermək olar.

A.İsmayılzadə bağırsağında göbələk məskunlaşmış uşaqların dilinin ərpli olduğunu söyləyib:
“Dad reseptorları ərp ilə örtülü olduğundan iştahsız olur və yediklərinin dadını yaxşı hiss etmirlər. Nəcisin ümumi analizində kandida göbələyi bir neçə plus (+) ilə göstərilir. Normada onsuz da var, amma bizi narahat edəcək qədər olmur.

Bu zaman göbələk əleyhinə verilən dərmanın da bir əhəmiyyəti yoxdur. Çünki aktiv olanlar ölsə də, eyni qidalanma ilə əvvəlki vəziyyətə qayıdacağıq. Ağız içi kandidozu, anusətrafı kandidoz zamanı yaranan diskomforta görə isə göbələyə qarşı dərman təyin edə bilərik. Amma hər antibiotik qəbulundan sonra bunu etmək lazim deyil. Antibiotikdən sonra yaxşı bakteriyalar öldüyü üçün göbələk artır. Ona görə antibiotikdən sonra probiotik vermək lazımdir ki, göbələk inkişaf edə bilməsin. Göbələk əleyhinə dərman vermək pozulmuş mikrobiotanı düzəltməməklə yanaşı, həm də qaraciyərə zərərdir”,- deyə o əlavə edib. 

Bllurə Yunus