Uşağınız suçiçəyi olubsa, bu qidaları yeməsin! - Həkimdən xəbərdarlıq

Ölkə.Az xəbər verir ki, bu sözləri pediatr Aytən İsmayılzadə deyib. O bildirib ki, bu xəstəlik gələcəkdə də müəyyən fəsadlara səbəb ola bilir:

“Ciddi fəsadlarını hələ ki görməsək də, (istisna da deyil) bu virus bədəndə sinir hüceyrələrində qalır və uşaq vaxtı su çiçəyi keçirmiş şəxsin böyüyəndə “herpes zoster” kimi ağrılı, göynədici kəmərlərici dəmrov xəstəliyi ilə üzləşməsinə gətirə bilir. Hamiləliyin əvvəlki aylarında təhlükəli olmasa da, son aylarda suçiçəyinə yoluxmuş hamilənin körpəsi anadangəlmə su çiçəyi ilə doğula bilir ki, bu da çox risklidir.

Bizim ölkədə suçiçəyi peyvənd cədvəlinə daxil deyil. Başqa ölkələrdə, eləcə də Türkiyədə məcburidir. Hər bir halda bu virus xəstəliyi peyvəndlə qoruna bilirsə, niyə də olmasın?! Çünki immunitetin elə zəif halları ola bilər ki, suçiçəyi virusu ciddi ağırlaşma ilə özünü göstərər”.

Həkim suçiçəyinə yoluxan zaman görülməli olan tədbirlərdən də söz açıb:

“Suçiçəyi keçirən uşağın səpkilərindəki maye irinli olarsa, bronxit, pnevmoniya inkişaf edərsə, antibiotik təyin edilir. Nə qədər ki, şəffaf mayedir, hərarət yüksək deyil, xəstəlik mülayim gedişlidir, antibiotik təyin etmirik.

Pəhriz isə ona görə lazımdır ki, eyni səpkilər həm də mədə bağırsaq selikli qişasında var. Ona görə əlavə səpki verə biləcək çiyələk, pomidor kimi məhsulıar olmaz. Qızarmış yeməkləri də suda, buxarda bişmiş olanlarla əvəz etmək lazımdır”.

Billurə Yunus