Vərəm peyvəndindən sonra iltihablanma olarsa, nə etməliyik?

Ölkə.Az xəbər verir ki, bunu pediatr Aytən İsmayılzadə deyib. O bildirib ki, bu cür iltihablanmalar zamanı heç bir müdaxilə lazım olmur:

"Hər hansı bir məlhəm, yod vurmağa və s. gərək yoxdur. Sadəcə gözləyirik, proses özü sonlanır və kiçik çapıq toxuma yaranır.
Bu yerli reaksiya vərəm çöplərinə qarşı immunitet tərəfindən yaranır. Uşağın həyatı üçün təhlükəsi yoxdur. Bu cür reaksiyanı peyvənddən 1-2 ay sonra görə bilərik. 4-cü aya doğru çapıq formalaşır. Heç bir reaksiya görülməyə də bilər. Lakin bu o demək deyil ki, peyvənd ikinci dəfə edilməlidir". 

Pediatr BCG (BSJ) peyvəndinin nə üçün zərur olmasından da söz açıb:

"BCG peyvəndi uşaqlara doğulduqdan sonra bir həftə ərzində bir dəfə edilir. Əgər hər hansı səbəbdən edilməyibsə (məsələn, uşağın çəkisi 2500 qramdan az olubsa), o zaman ilk iki ay ərzində edilir və ya sonra olacaqsa, mantu sınağından sonra icra olunur. Bu ona görədir ki, uşaq evdə artıq yoluxmuş ola bilər və bunu sınaq ilə həssaslığını yoxlamaq lazım gəlir ki, törədici olan bədənə peyvənd edilməsin. BCG peyvəndi yarımcanlı vərəm çöpləri ilə vərəm xəstəliyi aktiv olan ölkələrdə icra olunur. Vərəm xəstəliyi uşaqlar üçün ölümcül ola bilən xəstəlikdir. Təkcə ağciyərləri deyil, beyni, gözləri, dərini, sümüyü, bağırsağı da zədələyə bilir", - deyə o əlavə edib.

Billurə Yunus