Suçiçəyinə bənzəsə də, başqa xəstəlikdir - Həkimdən xəbərdarlıq

"Bəzi azyaşlı uşaqlarda müşahidə olunan səpgilər suçiçəyinə bənzəsə də, koksaki virusunun törətdiyi xəstəliyin nəticəsidir".

Ölkə.Az xəbər verir ki, bunu pediatr Aytən İsmayılzadə deyib. O bildirib ki, ötən il bu xəstəliyə tutulan uşaqlarda virusun yenidən üzə çıxması ehtimalı var:

"Bu virusdan sonra birdəfəlik immunitet yaranmır. Elə ciddi ağırlaşmalarını görmürük, amma yenə də bir virus xəstəliyi olduğunu unutmamalıyıq. Virus xəstəliyi ilə mübarizədə immunitet yorulur və ağırlaşma halları ola bilər. Uşağın evdə qalması, düzgun qidalanması və soyuğa məruz qalmaması vacibdir. Səpkilər qaşınan olmasa da, narahatedici olur. Ağız ətrafında, əllər, qollar, ayaqlar, ayaqaltı, popo nahiyəsində bərk qabıqlı, içi möhtəviyyatlı səpkilər yaranır. Səpkilər ağız içində, dildə, əsnəkdə və mədə - bağırsaq selikli qişasında da olur. Ona görə yeməyi udanda, kaka edəndə də uşaq narahat ola bilər. Turş, qızarmış və bərk qidalardan bu dövrdə uzaq durmaq lazımdır".

Həkimin sözlərinə görə, səpgilərin allergik olmamasına baxmayaraq onların artmasına şərait yarana bilər:

"Bu dövrdə uşaqlara sitrus meyvələri, şokolad, inək südü də vermək olmaz.  Hərarət uzun çəkmir və yüksək olmur. Əlləri və ayaqları təmiz saxlamaq kifayətdir. Səpkilərə başqa xüsusi qulluq lazım deyil. Bir həftə içərisində sağalma baş verir. Narahat olmağa gərək yoxdur. Müalicəyə də ehtiyac yoxdur. Bol maye isə həmişə doğru seçimdir", - deyə həkim söyləyib.

Billurə Yunus