İsti yay günlərində çağa uşaqlara su verilməlidirmi?

"Əgər körpə hələ bir aylıq olmayıbsa, ona su verməyə ehtiyac yoxdur. Çünki o, tez-tez ana südü ilə qidalanır və südün də 90%-i sudur (Ananın normal maye qəbulu şərtlərində).

Ölkə.Az xəbər verir ki, bunu pediatr Aytən İsmayılzadə deyib. O bildirib ki, br ayını ötmüş, çəkisi kifayət qədər olan və artıq rejimə saldığımız körpələrə isə su vermək olar:

"Nəzərə almalıyıq ki, ana da bu istidə çox tərləyib az su qəbul edirsə, südün sululuğu az olacaq. Yaxşı olar ki, süd verən ana isti yay günlərində daha çox su qəbul eləsin, susuzluğunu dondurma və ya soyuq, qazlı içkilərlə yatırmasın.

Körpəyə isə gün ərzində 2-3 dəfə 3-4 çay qaşığı su vermək olar. Su qaynadılmış və otaq temperaturunda olmalıdır. Suya nəsə qatmağa, şirinləşdirməyə gərək yoxdur. Bu, həm də zərərlidir. Suyu şüşəilə yox, məhz qaşıqla vermək lazımdır. Yaxşıca əmib yatan körpəyə yuxudan duranda və ya gecə yarısı istidən narahatdırsa və əmmirsə, su vermək olar. Əgər harasa getmisinizsə və uşağı əmizdirə bilmirsinizsə, su verə bilərsiniz. Çünki istidə su qidadan daha vacibdir. Susuzlaşma bədənin mayesi buxarlandıqca, tərlədikcə də olur".

Mütəxəssis körpənin susuz qalmasını göstərən əlamətlərdən də söz açıb:

"Bez üzərində narıncı ləkələrin olması, sidiyin tünd rəngdə olması, nəcisin qatılaşması, qəbizliyə meyillik suyun azlığından xəbər verir. Ola bilər ki, ümumi südün azlığı da bunlara səbəb olsun. Amma isti günlərdə ilk növbədə suya önəm veriririk və süd verən ana mütləq su qəbulunu artırmalıdır ki, südün su hissəsi də artsın. Əgər ana maye az qəbul etsə, bədəndəki maye tər və sidiklə çıxdığında süd yaranmağa az maye qalır və süd azalır.

Bəzən görürəm ki, analar bu istidə 4-5 aylıq körpəyə su vermir, deyirlər, 6 aya kimi olmaz. Əslində, gərək yoxdur, amma bu, daha çox mülayim hava şəraitinə görə uyğundur. Yüksək qızdırma olanda, ətrafda hava çox isti olanda çay qaşığı ilə su vermək lazımdır. Əgər körpə suyu içməkdən imtina edirsə, deməli, onun suya ehtiyacı südlə ödənir.

Su verərkən isə miqdarının çox olmamasına və ana südündən öncə verilməməsinə diqqət etmək lazımdır ki, uşaqda iştah azalmasın".

Billurə Yunus