ÜST meymunçiçəyi ilə mübarizə üçün lazım olan vəsaitin məbləğini açıqladı

Meymunçiçəyi ilə mübarizə üçün 6 ay ərzində 135 milyon dollar ayrılmalıdır.

"Ölkə.az" Qaynarinfo-ya istinadla xəbər verir ki, bu barədə Ümumdünya Səhiyyə Təşkilatının (ÜST) baş direktoru Tedros Adhanom Qebreyesus bildirib.

O, meymunçiçəyi xəstəliyinin yayılmasına qarşı kompleks tədbirlər görməyə çağırıb:

"Bu işi maliyyələşdirmək və epidemiyanı mümkün qədər tez dayandırmaq üçün strateji hazırlıq və cavab planı növbəti 6 ay ərzində epidemiyanın kəskin mərhələsi üçün təxminən 135 milyon dollar tələb edəcək".

Eyni zamanda, Qebreyesus bu məbləğin arta biləcəyini etiraf edib. Onun sözlərinə görə, gələn həftənin əvvəlində ÜST dünya ictimaiyyətinə meymunçiçəyi ilə mübarizə üçün vəsait ayrılması üçün müraciət dərc edəcək.

Qebreyesus ÜST-ün bu il bu məqsədlər üçün təcili ehtiyat fondundan təxminən 1,5 milyon dollar ayırdığını və donorlardan maliyyə alana qədər vəsait ayırmağa davam edəcəyini bildirib.

Ümumdünya Səhiyyə Təşkilatının rəhbəri xatırladıb ki, 2022-ci ildən, qlobal miqyasda meymunçiçəyi epidemiyası başlayandan bəri dünyada 100 mindən çox insan yoluxub və bu rəqəm artmaqda davam edir.

Bundan əvvəl ÜST meymun çiçəyinin yeni bir koronavirusa çevrilməyəcəyini və karantin tələb etməyəcəyini bildirib. Kütləvi peyvəndlərə də ehtiyac yoxdur.