Böcəyə görə 95 tır limanda saxlanıldı - Azərbaycanda da xəbərdarlıq edilmişdi
Ölkə.Az Türkiyə KİV-ə istinadla xəbər verir ki, Rusiyanın Tuapse limanından bərə ilə İstanbulun Haydarpaşa limanına gələn 95 tırın keçidinə dörd gündür icazə verilmir.
Yük maşını sürücüləri bildirib ki, hər nəqliyyat vasitəsinin dərmanlanması üçün onlardan 100 dollar tələb olunur və buna görə girov saxlanılırlar.
Qəhvəyi skunk böcəyi (Qəhvəyi mərmər bağacığı) Uzaq Şərqdə (Çin, Yaponiya və Koreya) vətəni olan invaziv bir növdür və qlobal ticarət yolu ilə bir çox ölkələrə yayılmış və ciddi kənd təsərrüfatı zərərvericisinə çevrilib.
Qəhvəyi skunk polifaq (çox şey yeyən) növdür və fındıq, alma, armud, şaftalı, qarğıdalı, pomidor və bibər daxil olmaqla təxminən 300 müxtəlif bitki növünə zərər vurma potensialına malikdir.
Ağız üzvləri ilə bitkilərin şirəsini soraraq qidalanır.
İnsan sağlamlığına birbaşa zəhərli təsir göstərmir. Bununla belə, yazın sonunda temperaturlar düşməyə başladığı üçün qışı keçirmək üçün kütləvi şəkildə evlərə, anbarlara və sığınacaqlı qapalı məkanlara köçməyə meyllidir.
Qeyd edək ki, bu yaxınlarda Azərbaycan Qida Təhlükəsizliyi Agentliyi (AQTA) də qəhvəyi mərmər bağacığı barədə əhaliyə xəbərdarlıq edib.
Bildirilib ki, yaşayış sahələrində kimyəvi mübarizə tədbirlərinin aparılması insan sağlamlığı üçün risklər yarada bilər. Buna görə də sakinlərin zərərvericiləri mexaniki üsullarla toplayaraq məhv etməsi xüsusilə vacibdir.
Billurə
