Gündə 6 saatdan az yatırsınız? - nəticəsi sizi təəccübləndirəcək

Ölkə.az xəbər verir ki, bu barədə yuxu mütəxəssisi Su Pikok "Metro" nəşrinə danışıb.

O izah edib ki, yuxu zamanı immun sistemi infeksiyalarla mübarizə aparan sitokinlər adlı qoruyucu maddələr hazırlayır. Sitokinlər həm də insanın rahat yatmasına kömək edir və immunitetin xəstəliklərə qarşı daha güclü müdafiə qurmasına şərait yaradır. Onun sözlərinə görə, kifayət qədər yatmayanlarda bu maddələrin istehsalı azalır, nəticədə xəstəliklərə qarşı həssaslıq artır və sağalma müddəti uzanır.

Mütəxəssis əlavə edib ki, yuxu çatışmazlığı insanlarda təşvişi artırır və bu da yuxuya getməyi çətinləşdirir. Bundan başqa, yuxu azlığı pozitiv əhvalı qorumağı çətinləşdirir, iştahanı artırır, həddindən artıq yeməyə səbəb olur və bunun nəticəsi olaraq çəki artımı baş verir.

Onun həmkarı Katarina Lederle isə bildirib ki, yuxu çatışmazlığı qalxanabənzər vəz hormonlarının səviyyəsinə mənfi təsir göstərə bilər və qadınlarda menstrual dövr pozuntularına və hətta düşük riskinə səbəb ola bilər.

Həmidə İbrahimova