Yeni yumurta qabığı trendi: Mütəxəssislər xəbərdarlıq edir

Ölkə.Az xəbər verir ki, bəzi sosial şəbəkə istifadəçiləri, xüsusən də fitness məzmunu yaradıcıları yumurta qabıqlarının faydalı olduğunu iddia edirlər.

Onlar yumurta qabıqlarının qida dəyərini və sağlamlıq faydalarından danışırlar.

Bəs yumurta qabıqları sağlamlıq üçün faydalıdırmı?

Təxminən 95% kalsium ehtiva edən yumurta qabıqları bu xüsusiyyətinə görə diqqəti cəlb edir. Sümük sağlamlığında, güclü dişlərdə, əzələ yığılmasında, sinir ötürülməsində və qan laxtalanmasında aktiv rol oynayan kalsium sümüklərin böyüməsi, inkişafı və saxlanması üçün vacibdir. Mütəxəssislərə görə, yetkin bir insanın gündəlik kalsium tələbatı təxminən 1000 milliqram olmalıdır. Yumurta qabıqlarındakı kalsiumun əhəmiyyətli bir hissəsi bədən tərəfindən mənimsənilə bilən kalsium karbonat şəklindədir.

Yumurta qabıqlarında kalsium, kalium, sink, dəmir və mis kimi minerallar faydalı olsa da, gündəlik ehtiyacları ödəmək üçün kifayət deyil.
Yumurta qabığının altındakı nazik membran təbəqəsində kollagen və hialuron turşusu kimi komponentlər var. Bu maddələrin sümük və oynaq sağlamlığı üçün vacib olduğu vurğulanır.

Yumurta qabıqları qida maddələri ilə zəngin olsa da, mütəxəssislər xəbərdarlıq edirlər ki, onları birbaşa istehlak etmək ciddi sağlamlıq riskləri yarada bilər. 

Qabığın iti kənarları ağız, boğaz və qida borusuna xəsarət yetirə bilər. Ən əsası isə, mütəxəssislər yumurta qabıqlarının səthində salmonella və digər zərərli mikroorqanizmlərin ola biləcəyi barədə xəbərdarlıq edir və bu da qida zəhərlənməsi riskinə diqqət çəkirlər.

Billurə