Ürəyi qorumaq üçün təkcə meyvə yemək kifayət deyil

Ürək sağlamlığını qorumaq üçün gündə beş porsiya meyvə və tərəvəz yemək tövsiyə olunsa da, yeni araşdırma göstərib ki, əsas məsələ miqdar deyil, hansı məhsulları seçdiyinizdir.

"Ölkə.az" xəbər verir ki, alimlər ürək-damar xəstəliklərindən ölüm riskini azaltmağa kömək edən flavanolların qidalanmada mühüm rol oynadığını açıqlayıblar. Flavanollar bitki mənşəli təbii antioksidantlardır və onların gündə təxminən 500 milliqram qəbul edilməsi ürək sağlamlığı üçün faydalı hesab olunur.

"Food and Function" jurnalında dərc olunan araşdırmada Böyük Britaniya və ABŞ-dan 30 mindən çox insanın məlumatları təhlil edilib. Nəticələr göstərib ki, sadəcə çoxlu meyvə və tərəvəz yemək kifayət deyil. Əsas olan flavanolla zəngin məhsulları seçməkdir.

Tədqiqatın rəhbəri doktor Xavyer Ottaviani bildirib ki, insanların əksəriyyəti bol meyvə-tərəvəz qəbul etməyin kifayət etdiyini düşünsə də, flavanol səviyyəsinə çatmaq üçün düzgün seçimlər etmək lazımdır.

Araşdırmaya görə, sağlam qidalanma qaydalarına əməl edən insanların yalnız 25 faizdən az hissəsi gündəlik tövsiyə olunan flavanol miqdarını qəbul edir. Hətta çox meyvə və tərəvəz yeyənlərlə az yeyənlər arasında flavanol qəbulu baxımından ciddi fərq aşkarlanmayıb.

Mütəxəssislər flavanol qəbulunu artırmaq üçün qida rasionuna böyürtkən, alma, yaşıl çay, lobya və digər paxlalıları daxil etməyi tövsiyə edirlər.

Flavanolla ən zəngin məhsullar arasında ərik, zoğal, böyürtkən, yaşıl çay, paxla, alça, qabıqlı alma, çiyələk, göyəm və pinto lobyası yer alır.

Alimlər hesab edirlər ki, gələcəkdə qidalanma tövsiyələri yalnız meyvə və tərəvəzin miqdarına deyil, onların tərkibindəki faydalı maddələrə görə də formalaşdırılmalıdır.(axşam.az)