"Orada bir dənə terrorist var idi, o da Kərimov Əli idi"
Dünən Milli Şuranın təşkil etdiyi mitinqdə İŞİD terror qruplaşmasının bayrağının dalğalanması insanların beynində bir sıra suallar yaratdı. Bir sıra insanlar bunun provakasiya məqsədi daşıdığını desədə, bəziləri bunu elə həmin mitinqin təşkilatçılarının işinin olduğunu dedi. Bir qrup insan isə bu hadisəyə səbəb mitinq keçirilməyə icazə ala bilməyən “Müasir Müsavat Partiyası”nın sədri Hafiz Haciyevlə əlaqəsinin olduğunu iddia etdilər.
Bu barədə Hafiz Hacıyev Ölkə.az-la öz fikirlərini bölüşüb.
Hafiz Hacıyev: "Orada bir dənə terrorist, terroristlərin başçısı var idisə, o da Kərimov Əlidir. Yanına ermənilərin qaynatası Həsənov Cəmili alıb, Azərbaycanda ideoloji terrorla məşğuldur. Orada İŞİD-in bayraqlarının dalğalandırılması və digər məsələlərdə birbaşa günahkar Kərimov Əlidir. Zamanı gəldikdə hər şeyə cavab verəcəkdir. Orada partiyamızın fəalları operativ şəkildə mitinqdə çox insan olmanın qarşısının alınması üçün böyük səy göstərdilər.Buna görə də onlara minnətdaram".
"O, bütün dünya terrorist qrupları ilə müqavilə bağlayar ki, onu hakimiyyətə gətirsinlər"
"Orda İŞİD-in bayraqlarının qaldırılması, İŞİD-lə əlaqəli olan görülən hər şey Kərimov Əlinin fikir daşıyıcıları idi. Hər şeyi ortaya qoymuşdular. Mitinqdən bir gün öncə Həsənov Cəmilin Azadlıq radiosuna verdiyi müsahibədə artıq hər şeyi ortada idi. Buna görə də biz imkan vermədik ki, onların əlinə haqlar verək və onlar ermənilərdən olan qohumlarına, AŞPA-ya, və ya Qərbdə olan qohumlarına “filankəslər mitinqi pozdular, qan töküldü”desinlər.Biz bunların qarşısını aldıq. İŞİD- bayrağının qaldırılmasında səbəbkar Kərimov Əlidir. O, bütün dünya terrorist qrupları ilə müqavilə bağlayar ki, Azərbaycanda gəlin terror edin bizi hakimiyyətə gətirin. Əlbəttə ki, o, bunu yuxusunda da görə bilməz. Mən düşünürəm ki, ölkədə sağlam qüvvələrin hamısı bu gün “Müasir Partiyası”nın əlini sürdüyü istiqamət üzrə hərəkət etməlidir. “Terrorsuz Azərbaycan” şüarı ilə biz irəli getməliyik. İmkan verməməliyik ki, azərbaycanlılar dünyada gedən bu proseslərə qoşulsun".
Qeyd edək ki, partiya sədri Ölkə.az-a bundan öncəki açıqlamasında bildirmişdir ki, Milli Şuranın mitinqində onların nümayəndələri də iştirak edəcəklər.
Fatimə İbrahimova
Ölkə.az
