Politoloq: "Ermənistan artıq hüquq subyekti deyil"

Ermənistan parlamenti ölkənin Avrasiya İqtisadi Birliyinə qoşulması ilə bağlı müqaviləni ratifikasiya edib. Ermənistan 1 yanvar 2015-ci ildən etibarən Avrasiya İqtisadi Birliyinin tamhüquqlu üzvü sayılacaq.

Ermənistanın Avrasiya İqtisadi Birliyinə qoşulmasını politoloq Zərdüşt Əlizadə və millət vəkili Asim Mollazadə Ölkə.az-a şərh etdilər.

Zərdüşt Əlizadə: "Ermənistanda parlament yoxdur. Bir dəstə oğru, "vor zakon" var ki, onların yığışdığı yeri parlament adlandırırlar. Bu Ermənistanın qərarı deyil, Rusiyanın qərarıdır. Rusiya əmr verib, onlar da yerinə yetiriblər. Satirik bir ölkə, oyuncaq parlament, ağasının qərarını yerinə yetirib.

Bəziləri yazıb ki, Ermənistan iqtisadiyyatı bundan sonra çiçəklənəcək. Bu nağıldan başqa bir şey deyil. Bu nağıla da yalnız sadəlövh adamlar inanır. Ermənistanın gələcəyi yoxdur. Bir dövlət kimi, millət kimi onlar məhvə məhkumdur.

Hər il 50 min erməni ölkəni tərk edir. 10 ildən sonra yarım milyon, 20 ildən sonra 1 milyon, 30 ildən sonra 1,5 milyon Ermənistandan qaçacaq və orda adam qalmayacaq. Bizə də deyəcəklər ki, sizin də neftiniz qurtarıb, zəhmət olmasa gəlin bura köçün yaşayın.

Ermənistan siyasətşünaslarının yazdığı kimi desək, Ermənistan artıq hüquq subyekti deyil. Onlar hüquq subyektiliyini itiriblər. Onlar Rusiyanın "For-post"u, ön istehkamı, oyuncaq bir dövlətidir".

Asim Mollazadə: "Ermənistan müstəqil dövlət deyil. Ermənistan Rusiyanın hərbi "For-post"udur. Rusiya hara əmr versə, Ermənistan ora da gedəcək. Ermənistan bir neçə il Avropa Birliyi ilə asossiativ saziş ətrafında avropalıları aldadırdı və sonra getdilər Avrasiya İqtisadi Birliyinə qoşuldular. Beynəlxalq ictimayət bu proseslərin şahidi oldu".

Səxavət Məmməd
Ölkə.az