Azərbaycan İtaliyaya nota verdi

İtaliyanın Rumini şəhərində keçirilən “TTG İncontri-Rimini-2014” adlı turizm sərgisində qondarma “Dağlıq Qarabağ Respublikası”-nın iştirakının qarşısı alınıb.

Bununla bağlı Xarici İşlər Nazirliyinin mətbuat xidmətinin rəhbəri Hikmət Hacıyev bildirib ki, Azərbaycanın İtaliyadakı səfirliyinin müdaxiləsindən sonra qondarma qurumun tədbirdə ştirakının qarşısı alınıb: “Bununla bağlı hətta İtaliya Xarici İşlər Nazirliyinə nota verilib. Eyni zamanda tədbirin təşkilatçıları olan şirkətlərə məsələ ilə bağlı məktublar ünvanlanıb”.

Onun sözlərinə görə, “Qarabağ İnkişaf Agentliyi” adlanan bir qurum işğalçı rejimdə turizmin inkişafı ilə məşğul olduğu üçün “DQR”-nın bu iştirakını təmin edib: “Bizim müraciətimizdən sonra bu təşkilatın sərgidə iştirakına icazə verilməyib. Ancaq Ermənistan hər zaman olduğu kimi, bu məsələdə də cılız metodlara əl ataraq təşkilatçıları aldatmağa nail olub. Belə ki, yalnız tədbirin son günü özlərinə aid olan hissədə Azərbaycan ərazilərini qondarma “DQR” əraziləri kimi təqdim edərək, “Qarabağ” adı altında müxtəlif nümunələr nümayiş etdirməyə cəhd ediblər”.

H.Hacıyev vurğulayıb ki, Azərbaycanın İtaliyadakı səfirliyi tərəfindən bu məsələ ilə bağlı növbəti addımlar atılacaq: “Hazırda da bu məsələ ilə bağlı müvafiq tədbirlər həyata keçirilir”. (salamnews)