ABŞ Konqresinin yeni qanun layihəsi Amerikanın ziyanınadır

Azərbaycanlı siyasətçilər bu qərarın riyakar və region üçün çox təhlükəli olduğunu bildirirlər. Politoloq Elxan Şahinoğlu “Ölkə.Az”a açıqlamasında bildirib ki, bu qərar birbaşa olaraq Azərbaycanın əleyhinə atılmış addımdır. Onun fikrincə, ayrılan vəsaitlər hərbi məsələlərə xərclənə bilər.

“Bu qərarı Azərbaycanın əleyhinə atılmış addım kimi qiymətləndirirəm. Amerika Azərbaycanı strateji tərəfdaş adlandırır və bu mənada Azərbaycanın ərazi bütövlüyünə hörmətlə yanaşılmalıdır. Belə çıxır ki, Rusiya Ermənistana silah verir. Amerika da separatçılara maliyyə yardımı göstərir. Maliyyə o adla ayrılır ki, guya ərazi minalardan təmizlənəcək. Lakin kim zəmanət verir ki, ayrılan pullar başqa istiqamətə xərclənməyəcək. Separatçılar həmin pulun bir hissəsini silahlanmaya xərcləyə bilər”, - deyə E. Şahinoğlu bildirib.

Politoloqun fikrincə, məsələyə ciddi münasibət bildirilməli və Azərbaycan tərəfindən rəsmi olaraq müdaxilələr olunmalıdır: “Azərbaycanın Vaşinqtondakı səfirliyi də məsələyə münasibət bildirməliydi. Bundan sonra belə addımlar atılmasın deyə, konqresmenlərlə də münasibətləri möhkəmlətmək lazımdır”.

E. Şahinoğlu hesab edir ki, ABŞ Konqresinin bu qərarı Amerika hökumətinin də ziyanına işləyir: “Bir tərəfdən Rusiyanı özlərinə rəqib sayırlar, digər tərəfdən isə rusların əsas strateji müttəfiqini sevindirirlər. Əslində bu qərar Amerikanın öz siyasətinə ziddir. Konqresin Rusiya əleyhinə qəbul etdiyi qərarlara qarşı atılan addımdır. Azərbaycan səfirliyi məhz bu nüansları konqresmenlərə anlatmalıdır”.

Mələsə ilə əlaqədar politoloq Adıgözəl Məmmədov da açıqlamasında qərarın məkrli olduğunu bildirib.

“Bu əslində ABŞ Konqresində əyləşmiş bir neçə riyakar konqresmenlərin təşəbbüsüdür. Çünki bu qərar Azərbaycan Respublikasının dövlət bütövlüyünə qarşı hesablanmış bir addımdır. Erməni lobbisinin maliyyə dəstəyi verdiyi konqres qrupunun təklifidir. Birinci Dağlı Qarabağ faktiki olaraq Azərbaycan Respublikasının ərazisidir. Əgər bunlar ərazilərin minalardan təmizlənməsi bəhanəsi altında maliyyə yardımı ayırırlarsa, həmin vəsait Azərbaycana verilməlidir. Bütün beynəlxalq qurumlar, onların təmsil etdiyi təşkilatlar Azərbaycanın ərazi bütövlüyünü tanıyır. Buna görə də, belə addımlar atılarkən mütləq Bakı ilə razılaşmalar olmalıydı. Ərazilərin minalardan təmizlənmə işləri Bakı vasitəsilə həyata keçirilməliydi. Açıq şəkildə görmək olar ki, bu addım riyakarlıqla Azərbaycan dövlət bütövlüyünə qarşı aparılan xəyanətdir”, - deyə A. Məmmədov bildirib.

Politoloq Qabil Huseynli də hesab edir ki, bu addımla ABŞ Konqresi ermənipərəst siyasət yürütdüyünü bir daha sübut edir. Onun fikrincə, bu çox riyakar və təcavüzkarları şirnikləşdirmək üçün atılan addımdır.

“Birinci dəfə deyil ki, belə yardımlar edilib. Vaxtilə də külli miqdarda vəsaitlər ayrılıb. Uzun mübarizədən sonra bunun qarşısını ala bildik. ABŞ Konqresi yenidən belə addım atmağa başlayıbsa, deməli regiondakı əminamanlığa və sabitliyə xidmət etmirlər. Hamıya məlumdur ki, Ermənistana və Separatçı Dağlıq Qarabağa ayrılan vəsaitlərin hamısı hərbi ehtiyaclara yönəlir. Bu da təcavüzkar Ermənistanın və onun əlaltısı olan separatçı rejimin mövqeylərinin daha da sərtləşməsinə xidmət edir. Bununla da, konqresmenlər və ABŞ hökuməti regionda gərginliyi daha da artırmaq istəyir. Tramp hökumətinin birdən-birə belə səxavətli addım atması təəccüb doğurur”, - deyə Q. Huseynli bildirib.