Tural Abbaslı: "Arif Hacılının tərəfdarlarının sayı üstünlük təşkil edir, ona görə də..."

"Müsavat" partiyasının sabiq üzvü Səxavət Əlisoy növbədənkənar qurultayın keçirilməsi ilə bağlı işə başladıqlarını bildirib. Səxavət Əlisoyun sözlərinə görə, artıq 10 gündür ki, bu istiqamətdə işlər aparılır və qurultay keçiriləcək.

Növbədənkənar qurultayın keçiriləcəyi ilə bağlı məsələyə partiyanın məclis üzvü və başqanlığa namizəd olmuş Tural Abbaslı Ölkə.Az-da münasibət bildirib.

"Yeni qurultaya hazırlıqla bağlı işçi qrupunda növbədənkənar qurultayın keçirilməsi üçün təşəbbüs qrupu yaradıldı. O qrupa Qubad İbadoğlu rəhbərlik edir. Digər bir qrup da yaradıldı, bu da partiyadaxili fraksiyanın yaradılması qrupu olacaq, ona da mən rəhbərlik edirəm. Növbədənkənar qurultayın çağırılmasının tərəfdarı deyiləm. Çünki seçkilərin nəticələrini tanıyıram. Bu qurultayın keçirilməsi texniki baxımdan da çətindir. Nizamnaməyə əsasən, növbədənkənar qurultayın çağırılma qaydaları var. Rayon təşkilatlarının 1/5-i, məclisin ümumi sayının isə 1/3-i bununla bağlı müraciət etməlidir. Sonda bütün bu müraciətlərə partiyanın məclisi qərar verəcək. Qurultayın çağırılması hüququ məclisə məxsusdur. Həmin məclisdə də Arif Hacılının tərəfdarlarının sayı üstünlük təşkil edir. Nəticədə qərarı məclis verəcəksə və o qurumda Arif Hacılının tərəfdarları say baxımından üstündürsə, növbədənkənar qurultayın çağırılması praktiki baxımdan mümkünsüzdür".

Səxavət Məmməd

Ölkə.Az