"Ermənistanın Azərbaycana qarşı təcavüzünün arxasında Rusiya dayanır"
Xəbər verdiyimiz kimi KTMT-nin sədri Nikolay Bardyuja və Ermənistanın müdafiə naziri Seyran Ohanyan Azərbaycan-Ermənistan sərhədindəki vəziyyətlə yaxından tanış olublar.
Rusiya rəsmilərinin Azərbaycana az qala "kütləvi səfəri" ərəfəsində bu addımın atılması beyinlərdə sual yaratdı. Bəs Bakı ilə Moskvanın yaxınlaşması, son bir ay ərzində iki ölkə arasında bağlanan ikitərəfli əməkdaşlıq haqqında onlarla müqavilə?
Nikolay Bardyujanın Ermənistan-Azərbaycan sərhədinə baş çəkməsinə Azərbaycan politoloqlarından münasibət bildiriblər.
Ölkə.Az-a danışan politoloq Zərdüşt Əlizadə hesab edir ki, baş verən səfərin əsas prinsipi bir növ Ermənistana “qorxmayın” mesajı ötürəkdən ibarətdir. Yəni Azərbaycanla Rusiya münasibətlərinin inkişaf etməsi Rusiya-Ermənistan münasibətlərinə heç bir təsir göstərə bilməz.
"Rusiya Azərbaycanla münasibətlərini davam etdirir, yaxşılaşdırmağa çalışır. Azərbaycandan bəzi gözləntiləri olduğuna görə bizə vədlər verir. Eyni zamanda bundan narahat olan Ermənistanı sakitləşdirmək üçün də döyüş bölgəsinə baş çəkərək erməni tərəfini sakitləşdirir. Bu bir növ Ermənistana “qorxmayın” mesajıdır. Yəni Azərbaycanla Rusiya münasibətlərinin inkişaf etməsi Rusiya-Ermənistan münasibətlərinə heç bir təsir göstərə bilməz".
Politoloq Vəfa Quluzadə isə saytımıza verdiyi qısa açıqlamasında hər zaman olduğu kimi Rusiyanın prinsipial mövqeyinin Ermənistanı dəstəkləmək olduğunu bildirdi.
"Rusiya Ermənistan təcavüzününün arxasında dayanır. Rusiyanın Ermənistana hər cür dəstək verməsi, silahlandırması, kəşfiyyat materiyalları və hər nə ilə deyirsiniz təmin etməsi məlumdur. Ona görə də, Nikolay Bardyuja öz müttəfiqinin işləri ilə məşğuldur və burada yeni heç nə yoxdur. Rusiyanın prinsipial mövqeyi var ki, o da Ermənistanı dəstəkləməkdir".
Analitik hesab edir ki, Rusiyanın bu kimi gedişi Ermənistanın daim arxasında olmasının göstəricisidir.
Qeyd edək ki, Nikolay Bardyuja ilk dəfə olaraq Ermənistan-Azərbaycan sərhədinə gələrək oradakı vəziyyətlə yaxından tanış olub.
Fatimə İbrahimova
Ölkə.az
