Azərbaycan kommunistlərinin liderindən Jirinovskiyə
R.Qurbanov “Ölkə.Az”-a açıqlamasında bildirib ki, Vladimir Jirinovski qeyri-ciddi adamdır:
“Şəxsən mən Vladimir Jirinovskini ciddi adam kimi qəbul etmirəm. O, hər dəfə Azərbaycan və digər keçmiş Sovet respublikaları haqqında cəfəng fikirlər səsləndirir. Mən bu cür açıqlamaları ciddi saymıram. Vladimir Jirinovski birdəfəlik dərk etməlidir ki, Azərbaycan 26 il öncə öz müstəqilliyini əldə edib. Bu gün də Azərbaycan müstəqil və suveren dövlətdir. Ona görə də Azərbaycanın hər hansı bir dövlətlə birləşməsi cəfəngiyyat və xəyaldır”.
Partiya sədri deyib ki, hazırda Azərbaycan bir çox beynəlxalq təşkilatların üzvüdür:
“Bizmlə Rusiya və digər dövlətlər bərabər hüquqlara malikdir. Rusiya kimi biz də BMT və digər beynəlxalq təşkilatların üzvüyük. Gələcəkdə də Azərbaycan hər hansı iqtisadi və ya siyasi təşkilatlara üzv olmadan öncə həmin qurumun milli və dövlət maraqlarına nə dərəcədəuyğun gəlməsi məsələsini nəzərə alacaq”.
Xatırladaq ki, bir neçə gün öncə V.Jirinovski “Dəyişən dünyada inteqrasiya prosesləri” mövzusunda müzakirə panelində çıxış edərkən bildirib ki, Azərbaycanda Qarabağ problemi hələ uzun illər qalacaq:
“Azərbaycan və Ermənistan barədə danışanda başa düşməliyik ki, onların elə əraziləri var ki, burada heç nəyi həll etmək mümkün deyil. Mən Azərbaycanı salamlayıram. Lakin, onlarda problem uzun illər qalacaq”.
Dağlıq Qarabağ münaqişəsi üzrə yeni bəyanatla çıxış edən Vladimir Jirinivski Azərbaycan və Ermənistanın Rusiyanın tərkibinə daxil edilməsini təklif edib:
“Burada xarici arbitr lazımdır. Bu isə yalnız Moskva ola bilər. Belə ki, onlar hamısı rus dilində danışır. Anoloji problem, münaqişə Dnestryanı, Abxaziya və Cənubi Asetiyada da var. Budur, 4 yer, hansılarda ki, imperiya və ya SSRİ-nin tərkibində olarkən problem yox idi. Lakin, ayrılan kimi problemlər başladı. Biz əminik ki, SSRİ sərhədləri könüllülük əsasında, referendum yolu ilə bərpa olunmalıdır. Bütün keçmiş respublikalar Rusiyanın tərkibinə daxil edilməlidir. Bu zaman sülh təmin olunacaq, bütün daxili və yaxud da yerli münaqişələr öz həllini tapacaq, nəhəng ölkənin bütün xalqları sabahından qorxmadan, sakit şəraitdə yaşaya biləcəklər”.
Onu da bildirək ki, Vladimir Jirinivski bu cür sərsəm çıxışları təkcə Azərbaycana qarşı etməklə yadda qalmayıb. O, dəfələrlə keçmiş SSRİ respublikalarının Rusiyaya birləşməsini təklif edib.
Vasif Həsənli
Ölkə.Az
