Sədirliyi Belçikaya veririk
Strasburqda Avropa Şurası Parlament Assambleyasının (AŞPA) payız sessiyası davam edir
Sessiyanın bugünkü iclasında Avropa Şurası Nazirlər Komitəsinin sədri, Azərbaycanın xarici işlər naziri Elmar Məmmədyarov ölkəmizin AŞ Nazirlər Komitəsinə sədrliyi dövründə həyata keçirilən tədbirlərdən danışıb.
O bildirib ki, bu il noyabrın 13-də Nazirlər Komitəsinə sədrlik Belçikaya veriləcək. Ona qədər biz prioritetlərimizi həyata keçirməyə davam edəcəyik.
Nazir idman sahəsində Avropa Şurası ilə əməkdaşlığa toxunaraq sentyabrın 17-də İsveçrənin Makolin şəhərində idmanın idarə olunmasında korrupsiya hallarına qarşı mübarizəni gücləndirmək məqsədiylə “İdman yarışlarının manipulyasiyasına dair” konvensiyanın 2015-ci ildə Bakıda təşkil olunacaq Avropa Olimpiya Oyunlarının keçirilməsindən əvvəl qəbul olunmasının əhəmiyyətindən danışıb.
E.Məmmədyarov Azərbaycanın sədrliyi dövründə Bakıda bu il iyunun 30-dan iyulun 1-dək baş tutan “Korrupsiyaya qarşı mübarizə: Milli təcrübələr və beynəlxalq standartlar” adlı tədbiri, “Yaxşı idarəçilik və insan hüquqları kontekstində ictimai xidmət” mövzusunda təşkil olunan beynəlxalq konfransı xatırladıb, Azərbaycanın yaxşı təcrübələrinin mübadilə olunması məqsədi ilə ictimai xidmətlər sahəsində əməkdaşlıq platforması – beynəlxalq assosiasiya yaradılması təklifini irəli sürüb.
Nazir söyləyib ki, XI Avropa Mədəniyyət Nazirlərinin Bakı konfransı da Azəbaycanın Nazirlər Kabinetinin sədrliyi dövründə təşkil olunub. İlk dəfə Avropa Şurasında rəqəmsal mədəniyyət və vətəndaşların avtonomlaşması sahəsində mükəmməl mühitin yaradılması mövzusunda müzakirə aparılıb. Mədəniyyətlərarası dialoq sahəsində IV Bakı Beynəlxalq Humanitar Forumun önəmini vurğulayan XİN rəhbəri bildirib ki, bu tədbir mədəni, elmi və siyasi sahədən olan insanlara multikulturalizmin fəlsəfəsi və birgə tolerant yaşamaq kontekstində böyük töhfə verəcək. Azərbaycan hökumətinin dəstəyi ilə 2016-cı ildə BMT-nin Sivilizasiyalar Alyansının VII Qlobal Forumu, eləcə də Azərbaycan hökumətinin AŞ sosial müdafiə nazirlərinin növbəti konfransın, Avropa Şurasının institusional dəstəyi ilə BMT Gənclər siyasəti sahəsində Qlobal Forumun oktyabrın sonunda Bakıda təşkil olunacağını söyləyib.
Avropa Şurasının qonşu regionlarla əməkdaşlıq siyasətinə diqqət çəkən azərbaycanlı nazir məhz qonşuluq siyasəti mövzusunda Bakının noyabrın 7-8-də ev sahibliyi edəcəyi beynəlxalq konfransı sessiya iştirakçılarının diqqətinə çatdırıb. Konfransın məqsədi qonşu regiondan olan dövlətlərlə gələcək əməkdaşlıq, siyasi dialoq və regional inteqrasiya istiqamətində fikir mübadiləsinin aparılmasıdır.
Sonda avropalı parlamentarilər siyasi qruplar adından Azərbaycan Xarici İşlər Naziri Elmar Məmmədyarova suallarını ünvanlayıblar./Anspress/
Ölkə.Az
