Müsavat mitinqin nəticələrini müzakirə edib

Bu gün Müsavat Partiyasının Divanının növbəti iclası keçirilib. 

Divanda qərarların icrası və görülən işlər barədə məlumat verilib.

İclasda bu gün Müsavat Partiyasının başqanı Arif Hacılı ABŞ-ın Azərbaycandakı səfir əvəzi Derek J. Hoqanla görüşü qeyd edilib. Derek J. Hoqan ilk növbədə Müsavat Partiyasının VIII Qurultayını yaxından izlədiyini bildirib və Arif Hacılını demokratik seçkidə Müsavat başqanı seçilməsi münasibətilə təbrik edib. Müzakirədə Qarabağ, insan haqları, ölkədə və regionda geosiyasi, enerji təhlükəsizliyi və digər məsələlərlə bağlı fikir mübadiləsi aparılıb.

Divanda 14 dekabr 2014-cü il tarixdə Beynəlxalq İnsan Haqları Günü münasibəti ilə “Siyasi məhbuslara azadlıq!” şüarı ilə keçirilən mitinqin nəticələri ölkədə insan haqları və siyasi məhbuslarla bağlı problemlərə diqqətin cəlb cəlb olunması baxımından müsbət qiymətləndirilib. Mitinqlə bağlı təşkilati texniki məsələlər geniş müzakirə olunaraq müvafiq qərarlar qəbul edilib.

Vicdan məhbusu Yadigar Sadıqovun vaxtından əvvəl həbsin şərti cəza ilə əvəz edilməsi ilə bağlı qərardan verilən şikayətinə Bakı Apellyasiya Məhkəməsində və həbsindən verilən kassasiya şikayətinə Ali Məhkəmədə keçiriləcək məhkəmə prosesinə hazırlıqla bağlı məsələ müzakirə olunub.

Divan siyasi məhbuslar Sirac Kərimlini həbs müddətinin qanunsuz olaraq uzadılmasını, onun səhhətində ciddi problemlərin olmasına baxmayaraq həkim müayinəsindən keçirilməməsini və Orxan Əyyubzadənin əsassız olaraq karsa salınmasını pisləyib.

Yığıncaqda Müsavat Partiyasının növbəti Məclisinin 27 dekabr 2014-cü il tarixində çağırılması və həmin toplantıda Məclisin sədri və digər strukturlara seçkilərin keçirilməsi haqqında qərar qəbul edilib.

Sonda cari məsələlərə baxılıb.

Ölkə.Az