"Qərb Türkiyəyə təzyiq etməyə çalışır ancaq..."

Türkiyə prezidenti Rəcəb Tayyib Ərdoğan həbs olunanlarla bağlı Avropa İttifaqından gələn qınaqları sərt şəkildə cavablandırıb.

İllər boyu Türkiyənin qarşısına qoyduğu əsas məqsədlərdən biri Avropa İttifaqına qoşulmaq idisə, artıq Ərdoğan çıxışında bildirib ki, Aİ-nın bizi qəbul edib-etməyəcəyi kimi bir dərdimiz yoxdur. Avropa İttifaqı öz işinə baxsın.

Türkiyənin son zamanlar sərgilədiyi siyasəti politoloq Elxan Şahinoğlu Ölkə.az-a şərh edib.

Elxan Şahinoğlu: "Nə ABŞ-ın, nə də Avropa İttifaqının Ərdoğan və Türkiyəyə qarşı əlində heç bir təzyiq aləti yoxdur. Hal hazırda ABŞ-la Türkiyə münasibətlərində gərginlik var.

Türkiyə daha çox Rusiya kimi dövlətlə əməkdaşlığa üstünlük verir və bundan divident əldə edir. Türkiyənin Rusiya ilə əməkdaşlığı nəticəsində 5 ildə ticarət mübadiləsi 100 milyard dollar olacaq. Rusiya Türkiyədə 20 milyard dollara atom elektrik stansiyası tikir. 5-6 milyon rus turist Türkiyəyə gəlir ki, bu da əlavə gəlir mənbəyidir. Bunların hamısı ABŞ-la var? Əlbətdə yoxdur. O cümlədən də Avropa İttiffaqı ilə.

Türkiyə 50 ildir Avropa İttifaqının qapısını döyür ancaq qərb Türkiyəni qapıda gözlədir. İndi Türkiyə Rusiya ilə əməkdaşlığı gücləndirir, özünün müstəqil xarici və daxili siyasətini yürüdür, bu da Avropanı narahat edir. Ona görə də, qərb Türkiyəyə təzyiq etməyə çalışır.

Ərdoğan dediyi kimi bu təzyiqlərə əhəmiyyət vermir. Əsas məsələ ondadır ki, Avropa İttifaqnın və ABŞ-ın Türkiyəyə təzyiq etmək üçün əlində aləti yoxdur.

Türkiyənin siyasəti də dəyişib. Əgər əvvəllər Türkiyə Avropa İttifaqına üzvlüyü qarşısına əsas hədəf qoyurdusa artıq belə bir hədəfləri də yoxdur. Ukrayna böhranı da bunu göstərir.

Qərbin Rusiyaya qarşı sanksiyalar var. Türkiyə bu sanksiyalara qoşulmur. Əgər Türkiyə Avropa İttifaqının üzvü olsa idi hal hazırda Rusiya ilə bu cür əməkdaşlıq edə bilməyəcəydi. Məcbur qalıb Türkiyə də sanksiyalara qoşulacaqdı.

Türkiyənin Avropa İttifaqının üzvü olmaması Türkiyənin işinə yaradı ki, Rusiya ilə bu cür iqtisadı əməkdaşlıqdan qopmadı. Ona görə də, Ərdoğanın sözlərində o mənada həqiqət var ki, Avropa İttifaqı onlar üçün əsas deyil".

Səxavət Məmməd

Ölkə.az