Zahid Oruc: "Necə olur Əli Kərimlinin övladı İngiltərənin..."
Həbsdəki "Nida"çıların əfv edilmək üçün prezidentə müraciət etməsi məsələsinə millət vəkili Zahid Oruc Ölkə.az-a verdiyi açıqlamasında münasibət bildirib:
"Gənclərin əfv edilməsi və gələcəkdə dövlət quruculuğu prossesində, ictimai həyatda, ümumilikdə bir gənc kimi formalaşması işinə ayrı bir nəzərdən yanaşacaqlarını təqdirə layiq bir hadisə kimi dəyərləndirirəm. Ancaq iş ondadır ki, bu hadisələrin üzərində çoxlu manupulyasiyalar davam etməkdədir. Sanki bu adamları qurbanlıq seçən, hakimiyyət uğrunda mübarizəsində aralıq bir mərhələ sayan, bu adamların başından çox beyninə istinad edən dairələr var. Uzun müddətdir ki, bunları müşahidə etmişik. Əslində bu keçmiş təcrübədir, yeni bir hadisə deyil. Zamanında bu cür adamları ayağa qaldırıb, Azərbaycan mənafeyi adıyla onların bir qismini qeyri-bərabər mübarizədə, və ya müharibədə iqtidara gedən yolda istifadə edib, o dünyaya göndərdilər. Onların çoxu indi xiyabanlarda uyuyur.
""Öz gələcəklərini düşünərək bir fikir söyləyən "Nida"çılar niyə satılmış kimi qəbul edilməlidir ki?!""
"Bəli, biz indi onlara qəhrəman kimi baxırıq ki, canlarını fəda ediblər. Amma sadəcə yoldan götürülüb döyüşə göndərilənlər, və yaxud səngərdən çıxarılıb paytaxta gətirilib prezident aparatını tutmaq üçün istifadə olunanlar və hər partiyanın çevrəsində yaranan silahlı təşkilatlar sonda Azərbaycan ailələrinə faciələr gətirdi. Ailələrin övladları özlərinə deyil, Əli Kərimliyə, İsa Qəmbərə xidmət göstərdi. Dediyimiz kimi çoxu indi xiyabanlarda uyuyurlar.
Eynən də nidaçılar...
Cümlə quruluşunda olduğu kimi sözün sonluğuna bir durğu işarəsi kimi istifadə olunan bir vasitə idi onlar. Sosial şəbəkələrdə məlum saxta ünvanlardan və bəzi çevrələrdən onların sındırıldığı, satıldığı və sairə kimi ittihamlar meydana gəlib. Necə olur, bu adamlar kimlərinsə mənafelərindən çıxış edəndə yaxşı idi, indi sadəcə öz gələcəklərinin düşüncəsində bir fikir söyləyirlərsə, niyə satılmış kimi qəbul edilməlidirlər ki?!"
""Müsavat”ın gəncliyə olan münasibətinin necə olduğunu qurultayda gənc namizədin topladığı səslərin sayından gördük""
"Düşünürəm ki, o adamları müxtəlif formada provakasiya edib, sanki hakimiyyətlə döyüşə çağırmaq, lakin özləri isə bunun kənarında qalmaq, öz övladlarını isə Britaniyanın ən nüfuzlu universitetlərində təhsil vermək onlara utanc verməlidir. Necə olur Əli Kərimlinin övladı İngiltərənin ən nüfuzlu universitetlərindən birində təhsil alır, amma bu nidaçılardan inqilabçı komikadzelər yetişdirmək istəyirlər. Axı nədir bunun adı?!"
Qeyd edək ki, "Nida" Hərəkatının Bakı İstintaq Təcridxanasında saxlanılan üzvləri Rəşadət Axundov, Rəşad Həsənov, Üzeyir Məmmədli, Zaur Qurbanlı, Məmməd Əzizov və İlkin Rüstəmzadə ölkə prezidenti İlham Əliyevə müraciət edərək həbs cəzasından olunmaqlarını istəyiblər.
Fatimə İbrahimova
Ölkə.az
