BMT Səudiyyə Ərəbistanı ilə bağlı bəyanat yaydı
"Ölkə.Az" xəbər verir ki, şura üzvləri Husilərin Səudiyyə Ərəbistanına, həmçinin digər region dövlətlərinə qarşı bu hücumları davam etdirmək niyyətində olduğunu bəyan etməsindən narahatlıqlarını ifadə ediblər.
Təhlükəsizlik Şurası üzvləri bütün üzv dövlətləri BMT TŞ-nın müvafiq qərarlarına uyğun olaraq silahlara qoyulmuş qadağanın bütün yönlərini tam icra etməyə çağıraraq, bu qadağanın pozulmasının davam etməsini göstərən hesabatlardan narahatlıq keçirdiklərini bildiriblər.
Təhlükəsizlik Şurası üzvləri qeyd ediblər ki, Körfəz Əməkdaşlıq Şurası Təşəbbüsü və onun mexanizmləri, Hərtərəfli Milli Dialoq Konfransının nəticələri, BMT TŞ-nın müvafiq bəyanat və qərarları, o cümlədən 2216 saylı qərarı, hamının hərtərəfli danışıqlar aparmasına və Yəmən böhranının siyasi həllinə zəmin yaradır. Onlar bu qərarların hələ də icra edilməməsindən narahatlıqlarını ifadə ediblər.
Təhlükəsizlik Şurası üzvləri bütün tərəfləri, Yəməndə qarşıdurmaya son qoyulması üçün tez bir zamanda son həll və hərtərəfli razılaşmaya nail olunması məqsədi ilə danışıqlara cəlb edilməsi uğrunda ardıcıl səy göstərən BMT-nin Yəməndəki nümayəndəsi İsmayıl Valəd əş-Şeyx Əhmədin fəaliyyətinə öz konstruktiv iştirakları ilə dəstək verməyə səsləyiblər.
Təhlükəsizlik Şurası üzvləri Yəməndə humanitar vəziyyətin pisləşməsindən öz narahatlıqlarını ifadə ediblər. Onlar bütün tərəfləri, humanitar yardımların və işçilərin bütün əziyyət çəkən bölgə sakinlərinə tez və maneəsiz şəkildə yetişməsinə şərait yaratmağa, ölkəyə əsas idxal məhsullarının, o cümlədən ərzaq, yanacaq və tibbi yardımların alınması və onların hər yerdə paylanmasını sadələşdirməyə çağırıblar.
Bu xüsusda Təhlükəsizlik Şurası üzvləri Səudiyyə Ərəbistanı Krallığının, Hüdeydə limanı ilə bağlı verdiyi bəyanatı təqdir ediblər. Təhlükəsizlik Şurası üzvləri bütün tərəfləri, beynəlxalq humanitar qanuna əməl etməyə çağırıblar. Təhlükəsizlik Şurası üzvləri Yəmənin birliyi, suverenliyi, müstəqilliyi və torpaq bütünlüyü ilə bağlı güclü öhdəliklərini bir daha vurğulayıblar.
