"“IV Bakı Beynəlxalq Humanitar Forumu”

Azərbaycan Respublikasının Meksika Birləşmiş Ştatlarındakı Səfirliyinin Mətbuat Xidmətindən Ölkə.Az-a verilən məlumatı görə, Meksikada nəşr edilən “Mundo Internacional” jurnalının növbəti buraxılışında “IV Bakı Beynəlxalq Humanitar Forumu”, “Respublika Senatında Qarabağ mənim xatirimdə rəsm sərgisi”, “Azərbaycanın müqəddəs musiqisi” və “Heydər Əliyev Fondu” sərlövhəli 4 məqalə dərc olunub.

“IV Bakı Beynəlxalq Humanitar Forumu” adlı məqalədə Forumun iştirakçıları barədə məlumat verilib, Forumda dörd keçmiş dövlət başçısı, 14 Nobel mükafatı laureatları, 41 ictimai xadim və məşhur beynəlxalq siyasətçi, 63 ölkədən 500 iştirakçı və dörd beynəlxalq təşkilatın iştirak etdiyi qeyd olunub.

Həmçinin Forum zamanı təşkil olunmuş dəyirmi masalar və müzakirə edilmiş mövzulardan, habelə Meksika Senatı Xarici Əlaqələr Komitəsinin Sədri xanım Senator Qabriela Kuevas Barronun Forumda iştirakından bəhs edilib. Məqalədə daha sonra Forum iştirkaçılarının, Azərbaycanın müxtəlif bölgələri ilə yaxından tanışlığı haqqında yazılıb.

“Respublika Senatında Qarabağ mənim xatirimdə rəsm sərgisi” başlıqlı məqalədə Meksika Senatında ABŞ-da yaşayan azərbaycanlı rəssam və memar Yavər Rzayevin rəsm ekspozisiyalarından ibarət Qarabağın tarixi və təbii landşaftını əks etdirən “Qarabağ mənim
xatirimdə” adlı sərginin keçirildiyi ifadə olunub. Sərginin Senatın Xarici əlaqələr komitəsinin təşkilatçılığı ilə keçirildiyi, tədbirin açılış mərasimində Meksika Konqresi və ölkə ictimaiyyətinin nümayəndələri, diplomatik korpusun üzvləri, habelə Senatın Vitse Prezidenti Xose Rosas Arispuro və Xarici Əlaqələr Komitəsinin Sədri xanım Senator Qabriela Kuevas Barronun iştirak etdiyi bildirilib.

Sərginin açılışı zamanı çıxış edən xanım Q.Kuevas sərginin təşkilinə görə Azərbaycanın Meksikadakı Səfiri İlqar Muxtarova təşəkkür edib, sərginin dünyada mədəni müxtəlifliyə və sivilizasiyalararası dialoqa dəstəyin nümayişi və xalqlarımız arasında mədəni körpü olduğunu bildirib. Q.Kuevas, Yavər Rzayevin tanınmış memar və rəssam olduğunu, əsərlərinə dünyanın müxtəlif mədəniyyət festivallarında rast gəlindiyini qeyd edərək, bu günkü sərgi ilə ölkəsinin regionumuza bir daha yaxınlaşdığını diqqətə çatdırıb.

Öz növbəsində çıxış edən Səfir İ.Muxtarov bu tədbirin Azərbaycan və Meksika mədəniyyətlərinin yaxınlaşmasına xidmət etməklə yanaşı, ikitərəfli əlaqələrimizin inkişafının göstəricisi olduğunu diqqətə çatdırıb.

Meksikanın Amerika qitəsində Azərbaycan üçün əhəmiyyətini vurğulayan Səfir İ.Muxtarov, Qafqaz və Avrasiya regionunda aparıcı rol oynayan Azərbaycanda Meksika üçün geniş əməkdaşlıq imkanlarının olduğunu diqqətə çatdırıb.

Qarabağın təkcə təbii deyil, eyni zamanda böyük mədəni zənginliklərə malik olduğunu qeyd edən Səfir, bölgənin məşhur muğam və xalçaçılıq sənəti, habelə şair, yazıçı, rəssam və bəstəkarlar diyarı olduğunu diqqətə çatdırıb.

Azərbaycanın tarixi torpaqlarının 20 faizinin Ermənistan tərəfindən işğal edildiyini və 1 milyona yaxın əhalisinin qaçqın və məcburi köçkünə çevirildiyini xatırladan İ.Muxtarov, münaqişənin sülh yolu ilə həllinə ümidvar olduğunu vurğulayıb.

“Azərbaycanın müqəddəs musiqisi” başlıqılı məqalədə “Muğam”ın qədim köklərə malik yüksək mənəvi inkişaf, şifahi ənənə musiqisi və sənəti olmasından, həmçinin cari ilin oktyabr ayında Mexiko şəhər teatrında Alim Qasimovun möhtəşəm ifa və emosional təqdimat ilə çıxış etdiyi vurğulanıb.

“Heydər Əliyev Fondu” sərlövhəli məqalədə Heydər Əliyev Fondunun 10 illik fəaliyyəti dövründə Azərbaycanın ictimai və sosial həyatında çox mühüm yerə sahib olduğu vurğulanıb, habelə Fondun məqsədləri, Prezidentinin fəaliyyət sahəsi, strukturu və fəaliyyətindən bəhs edilib.

Məqalədə, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Azərbaycanın birinci xanımı Mehriban Əliyevanın rəhbərliyi ilə Heydər Əliyevin ideyalarına uyğun olaraq irimiqyaslı layihələr və proqramların həyata keçirilməsində dəstəyin təmin edilməsi məqsədilə 2004-cü ildən fəaliyyətə başlamış Heydər Əliyev Fondunun təhsil, səhiyyə, mədəniyyət, idman, elm və texnologiya, ekologiya, sosial sahələrdə, həmçinin Azərbaycanın xaricdə dəstəklənməsinə, onun mədəni irsinin qorunmasına yönəlmiş digər sahələrdə müxtəlif layihələr həyata keçirərək yeni cəmiyyət quruculuğunda fəal iştirak etdiyi, ölkənin sosial-iqtisadi inkişafına öz töhfəsini verdiyi xüsusilə vurğulanıb.

Ölkə.Az