İlham Əliyev: Sağlam dövlət-din münasibətlərinin qurulması böyük nailiyyətimizdir
"Vaxt gələcək işğal olunmuş ərazilərdəki məscidlər də bərpa olunacaq".
“Heydər Əliyevin dövründə ölkədə dövlət-din münasibətləri sağlam zəmində qurulmuşdur. O, həmişə qeyd edirdi ki, biz öz milli, dini adət-ənənələrimizə sadiq olaraq müasir, güclü dövlət qurmalıyıq. Bu idi onun strateji baxışları və dövlət-din münasibətlərinin qurulması, formalaşması böyük nailiyyətimzidir. Bu gün də bu siyasət davam etdirilir”.
Ölkə.Az-ın Azərbaycan Dövlət Televiziyasına istinadən verdiyi məlumata əsasən, bunu Azərbaycan Prezidenti İlham Əliyev Bakıda Heydər məscidinin açılışı mərasimində çıxışında deyib.
Dövlət başçısının sözlərinə görə, Heydər Əliyevin dövründə Azərbaycanda 500-dən çox məscid tikilmiş, 100-lərlə məscid təmir edilmişdir.
“Ulu öndər müqəddəs Kəbə içində namaz qılmışdır. Mən xoşbəxtəm ki, bu xoşbəxtlik mənə də nəsib olmuşdur. Milli, dini dəyərlərə o illərdə göstərilən diqqət və müəyyən edilmiş istiqamət bu günkü Azərbaycanın güclənməsinə xidmət etmişdir”, - deyə o bildirib.
Bu gün xalqla iqtidar arasında birliyin sarsılmaz olduğunu deyən prezident bildirib ki, yürüdülən siyasət xalqın maraqlarına söykənir. Dünyada maliyyə-iqtisadi böhranın yaşanmasına baxmayaraq, Azərbaycanda sabitlik bərqərar olub, beynəlxalq aləmdə ölkəmiz böyük nüfuz qazanıb.
“Azərbaycan bu gün dünyada söz sahibidir. Beynəlxalq nüfuzumuz günü-gündən möhkəmlənir. Dünya birliyinin üzvlərinin mütləq əksəriyyəti Azərbaycanı dəstəkləyirlər və bu dəstəyi bizə verilən səslərdə ifadə edirlər.
Azərbaycan dünyada etibarlı tərəfdaş kimi özünü təsdiq edibdir. Regional inkişaf üçün Azərbaycanın gördüyü işlər həlledici rol oynayır. Regional təhlükəsizlik, əməkdaşlıq, regional məsələlərin həlli. Budur bizim bu bölgədə ümumi işimizə qoyduğumuz töhvələr”, - deyə prezident bildirib.
Prezident həmçinin bildirib ki, Azərbaycanda bütün dini konfessiyaların nümayəndələri sülh şəraitində yaşayır. Sivilizasiyalararası dialoq məsələsində də Azərbaycan nümunəvi ölkədir. Artıq ölkəmizin dünyanın multikultiralizm mərkəzlərindən birinə çevrildiyini qeyd edən dövlət başçısı Ermənistan-Azərbaycan-Dağlq Qarabağ münaqişəsinə də toxundu və əmin olduğunu bildirdi ki, vaxt gələcək işğal olunmuş ərazilərdəki məscidlər də bərpa olunacaq.
14:55
Dekabrın 26-da Bakıda Heydər məscidinin açılışı olub.
Azərbaycan Prezidenti İlham Əliyev, xanımı Mehriban Əliyeva və ailə üzvləri mərasimdə iştirak ediblər.
Dövlət başçısının tapşırığı ilə inşa olunan bu yeni məscid 12 min kvadratmetr sahədə salınıb. Məscidin fasadı Şirvan-Abşeron memarlıq üslubunda xüsusi daşlarla üzlənib, ornamentlərin zənginliyi fasadda xüsusi arxitektura harmoniyası yaradıb. Burada 95 metr hündürlüyündə 4 minarə inşa olunub.
Qeyd edək ki, Prezident İlham Əliyev məscidin tikintisini daim diqqət mərkəzində saxlayıb, burada həyata keçirilən inşaat işlərinin gedişi ilə yaxından maraqlanıb, mütəmadi olaraq bura gələrək görülən işlərlə bağlı müvafiq tapşırıqlarını verib. Ümumi sahəsi 4200 kvadratmetr olan məscidin daxilində də xüsusi bəzək elementlərindən istifadə olunub, günbəzin kənarlarına Quran ayələri yazılıb. 55 metr hündürlüyündə olan baş günbəz, o cümlədən hündürlüyü 35 metr olan ikinci günbəz məscidin daxilinə xüsusi gözəllik verir.
Sonra Prezident İlham Əliyev, xanımı Mehriban Əliyeva və ailə üzvləri Heydər məscidinin açılışı münasibətilə keçirilən mərasimdə iştirak etdilər.
Mərasim “Qurani-Kərim”dən ayənin oxunması ilə başladı.
Prezident İlham Əliyev mərasimdə çıxış edərək ölkəmizin həyatında əlamətdar və tarixi hadisə olan Heydər məscidinin açılışı münasibətilə təbriklərini çatdırdı.
Sonra Şimali Qafqaz Müftilərinin Əlaqələndirmə Şurasının sədri, Rusiya Federasiyası Qaraçay-Çərkəz müftisi İsmayıl Berdiyev, Rus Pravoslav Kilsəsinin Bakı və Azərbaycan Yeparxiyasının rəhbəri Aleksandr, Bakı Dağ Yəhudiləri Dini İcmasının sədri Milix Yevdayev, Qafqaz Müsəlmanları İdarəsinin Rusiya Federasiyasındakı səlahiyyətli nümayəndəsi Şafik Pşixaçev və Qafqaz Müsəlmanları İdarəsinin sədri şeyxülislam Allahşükür Paşazadə çıxış etdilər.
Sonda ulu öndər Heydər Əliyevin və xanımı Zərifə Əliyevanın, o cümlədən Vətən uğrunda şəhid olanların ruhuna fatihə verildi./Azərtac/
Ölkə.Az
