Müsavat parlament seçkilərində iştirakla bağlı qərar verdi

Müsavat Partiyası 2015-ci ildə parlament seçkilərində iştirakla bağlı qərar verib.

Partiyadan daxil olan bəyanatda bildirilir ki, ölkədə dəyişikliklərin yalnız azad, demokratik seçkilər yolu ilə həyata keçirilməsinin vacibliyini qəbul edən Müsavat Partiyası 2015-ci ildə keçiriləcək Parlament seçkilərində, - proporsional seçki sisteminin tətbiq edilməsi, seçki qanunvericiliyinin təkmilləşdirilməsi, ölkədə bərabərhüquqlu sağlam rəqabət mühitinin yaradılması, seçki komissiyalarının və oradakı vəzifələrin aparıcı siyasi qüvvələrin etimadını qazanan şəkildə formalaşdırılması uğrunda ümumvətəndaş mübarizəsinin təşkili şərti ilə, - iştirakı məqsədəuyğun hesab edir. Avtoritar rejimi dəyişdirməyin yolu xalqı öz taleyinin müəyyənləşməsində iştirak zərurətinə inandırmaqla azad seçkiyə nail olmaqdan keçir.

Müsavat Partiyasının Məclisi bütün bunları nəzərə alaraq, Parlament seçkilərində iştirak məqsədilə demokratik düşərgənin aparıcı ictimai-siyasi qüvvələri ilə məsləhətləşmələrin aparılması, müttəfiqlik və ya funksional əməkdaşlıq haqqında çərçivə sənədinin hazırlanması istiqamətində səylərin artırılmasını zəruri hesab edir.

Müsavat Partiyasının Məclisi qərara alır ki, Parlament seçkilərində Müsavat Partiyasının iştirakı və onun formaları haqqında partiyanın strategiyası və taktikasının hazırlanması, dairələr üzrə namizədlərin və onların komandalarının müəyyənləşdirilməsi işinə start verilsin./Qafqazinfo/

Ölkə.Az