Alman deputat Azərbaycanın “qara siyahı”sına düşdü

Bundestaq üzvü Azərbaycanın işğal olunmuş ərazisinə qanunsuz səfər edib

Almaniya Bundestaqının üzvü, Xristian-Demokrat Partiyasından olan deputat Manfrend Qrund Azərbaycanın “qara siyahı”sına daxil edilib. Azərbaycan XİN-in mətbuat xidmətinin rəhbəri vəzifəsini icra edən Hikmət Hacıyev APA-ya bildirib ki, bu yaxınlarda Azərbaycanın Ermənistan tərəfindən işğal olunmuş ərazilərinə Bakıdan icazəsiz səfər edən və Dağlıq Qarabağdakı separatçı rejimin nümayəndələri ilə görüşlər keçirən M. Qrund Azərbaycan qanunlarına və beynəlxalq hüquq normalarına hörmətsizlik edib: “Azərbaycanın beynəlxalq səviyyədə tanınan ərazilərinə dövlətin icazəsi və razılığı olmadan səfər edən şəxslərin adı avtomatik olaraq Azərbaycanda “arzuolunmaz şəxslər” siyahısına düşür. Rəsmi Bakı bir daha vurğulayır ki, Ermənistan hərbi birləşmələrinin işğalı altında olan ərazilərə Azərbaycan hökuməti ilə razılaşdırmadan səfər etmək beynəlxalq hüquqa ziddir”.

Rəsmi Berlinə hər hansı rəsmi müraciət olunub-olunmayacağı barədə suala Azərbaycan XİN-in sözçüsü belə cavab verib: “Bu işlə bizim Almaniyadakı səfirliyimiz məşğul olacaq, gərəkli addımlar atılacaq”./Apa/

Ölkə.Az