Müsavat Divanının toplantısı keçirdi

Partiyadan daxil olan məlumata görə, yığıncaqda dünyaca məşhur cərrah, bütöv Azərbaycan ideyasının daşıyıcılarından biri, Güney Azərbaycanda nəşr olunan “Varlıq” dərgisinin qurucusu və rəhbəri Cavad Heyətin vəfatının 40-cı günü münasibəti ilə onun 2-ci Fəxri Xiyabanda məzarının ziyarət edilməsi haqqında məlumat verildi. Cavad Heyətin Azərbaycan xalqının milli-mənəvi varlığı uğrunda apardığı fəaliyyətinə həsr olunan konfransın keçirilməsi məqsədəuyğun hesab edilib.

Divan siyasi məhbusların apellyasiya məhkəmələrinin hüquqi əsaslar olmadan uzadılması, siyasi məhbusların işgəncələrə məruz qalması, onların hüquqlarının bilərəkdən pozulmasını pisləyib və bütün siyasi məhbusların dərhal azadlığa buraxılmasını tələb edib.

Yığıncaqda Avropa Parlamentinin Azərbaycanda insan haqlarının və siyasi məhbusların vəziyyəti ilə bağlı qəbul etdiyi qətnamənin Azərbaycan reallığını əsasən dəqiq qiymətləndirən bir sənəd olduğu bildirilib. Qarabağ problemi olan bir ölkə haqqında Avropa Parlamentinin belə bir qətnamə qəbul etməsinin məsuliyyətinin hakimiyyətin üzərinə düşdüyü bəyan edilib. Bu qətnamədə Azərbaycan hakimiyyətinə qarşı sanksiyaların gündəmə gətirilməsi Azərbaycan hakimiyyətinin bu günə qədər buraxdıqları səhvlərin nəticəsi olduğu bildirilib.

15 siyasi partiyanın toplaşdığı Demokratiya və İnsan Haqları Mərkəzinin “Azərbaycanda demokratiyanın vəziyyəti” mövzusunda 17 sentyabr 2014-cü il tarixdə keçirdiyi konfransda qəbul olunan qətnamə və bəyanata dəstək verilməsi, başlanan bu prosesin davam etdirilməsinin məqsədəuyğunluğu qeyd edilib.

Sonda cari məsələlərə baxılıb. (qafqazinfo)

Ölkə.Az