Fazil Mustafa: "Peşə təhsili ilə bağlı özəl müəssisələr yaradılmalıdır"

 "Ölkə.Az" xəbər verir ki, bu fikirləri Milli Məclisin bu gün keçirilən plenar iclasında çıxışı zamanı deputat Fazil Mustafa "Peşə təhsili haqqında" qanun layihəsinin müzakirəsi zamanı bildirib. F.Mustafa özəl təhsil müəssisələrində xərclərin dövlət və vətəndaş arasında bölüşdürülməsini təklif edib: 
“Həmin müəssisələrdə bir şagirdin təhsili 40 manata başa gəlirsə, onun 20 manatı vətəndaş, 20 manatı dövlət tərəfindən ödənilə bilər. Bu sahədə müasirləşməyə imkan yaratmaq lazımdır. Bəzən ali məktəblərdə belə, tələbə 3-cü kursa çatanda artıq təhsil aldığı ixtisasın əhəmiyyət itirdiyini görür. Ölkəmizdə qızların, qadınların peşə təhsili məsələsi aktualdır. Sahibkarları stimullaşdırmaq, vergidən azad emək lazımdır ki, peşə təhsili müəssisələri açsınlar. Qızlarımız bu müəssisələrdə peşə təhsili alsınlar. Bu gün qızlar 4 il özəl universitetdə oxuyur, lakin sonra aldığı təhsil üzrə işləmir, əmək bazarında yer tapmır.Bu qızları peşə təhsili vermək lazımdır ki, sabah ailə yükünün yarısını bölüşə bilsin”. 

Komitə sədri İsa Həbibbəyli isə millət vəkillərinin təkliflərinə münasibət bildirib. İ.Həbibəyli bu məsələlərin bir qisminin növbəti oxunuşda nəzərə alınacağını söyləyib.

 Daha sonra "Peşə təhsili haqqında" qanun layihəsi ikinci oxunuşda fəsillər üzrə müzakirəyə qoyularaq qəbul edilib. 

Vasif Həsənli 
Ölkə.Az