"Hər bir idmançı İlham Əliyevi növbəti dəfə prezident görmək istəyir"

Bu fikirləri "Ölkə.Az"a açıqlamasında Azərbaycan Dövlət Bədən Tərbiyəsi və İdman Akademiyası rektorunun müşaviri, Yeni Azərbaycan Partiyası (YAP) Respublika Gənclər Birliyinin İdarə Heyətinin üzvü, 33 yaşlı professor Yusif Babanlı bildirib.

Yusif Babanlı deyib ki, Azərbaycan xalqı kimi, onun idmançıları da "İlhamla irəli" deyir, cənab İlham Əliyevi növbəti dəfə prezident görmək istəyir:

"Bunun da konkret səbəbləri var. Çünki cənab prezident İlham Əliyev Azərbaycan dövlətinə rəhbərlik etdiyi ilk gündən bəri idmanımız zirvələrə ucalıb, bu sahədə böyük uğurlar əldə edilib. Mən bir qədər də əvvələ getmək istərdim. Ümumiyyətlə, Ulu Öndər Heydər Əliyev Azərbaycana rəhbərlik etdiyi gündən sonra ölkə idmanı inkişaf etməyə başlayıb. Təkcə gənclər və idman deyil, bütün sahələrdə güclü inkiçaf və nailiyyətlər əldə olunub. Ulu Öndər hakimiyyətə gələndən sonra Azərbaycan gənclərinin forumları keçirilib, Gənclər və İdman Nazirliyi yaradılıb, gənclərə və idmançılara dövlət tərəfindən böyük diqqət və qayğı göstərilir. Bu gün Azərbaycan növbəti prezident seçkiləri ərəfəsində olduğu üçün Ulu Öndər Heydər Əliyevin layiqli davamçısı cənab İlham Əliyevin ölkə gəncləri və idmançıları üçün gördüyü işləri yada salmaq istədim. Cənab İlham Əliyevin təşəbbüsü ilə Azərbaycan Gənclər Forumu, Prezident Administrasiyasında Gənclər və İdman Şöbəsi və sairə yaradılıb. Bütün bunlar dövlətin gənclərə və idmançılara verdiyi böyük diqqət və qayğının bariz nümunəsidir". 

Professor qeyd edib ki, prezident İlham Əliyevin namizədliyi ilə bağlı rayon və şəhərlərdə aparılan təbliğat kampaniyalarında Azərbaycan idmançıları və gəncləri xüsusi fəallığı ilə seçilir:

"Təbii ki, görülən işlərə qiymət vermək və onu təbliğ etmək hər birin gəncin borcudur. Azərbaycan gəncləri də bunu layiqincə davam etdirirlər. Ümumiyyətlə, cənab prezident İlham Əliyev Azərbaycanı dünyada idman ölkəsi kimi tanıtdırıb. Azərbaycanda nüfuzlu beynəlxalq idman yarışları təşkil olunur. Bütün bunlar isə Azərbaycanın dünyada olan nüfuzunu daha da artırır, ölkəmizin geniş tanıdılmasına töhfə verir. Cənab prezident İlham Əliyevin apardığı uğurlu xarici və daxili siyasətə biz gənclər və idmançılar da öz töhfəmizi vermək üçün qarşıdan gələn seçkilərdə onun namizədliyini dəstəkləyəcəyik. Hər bir idmançı və gənc cənab İlham Əliyevi Azərbaycanın növbəti dəfə prezidenti görmək istəyir".

Vasif Həsənli
Ölkə.Az