Prezidentə təbriklər gəlməkdə davam edir
"Ölkə.Az"ın məlumatına görə, təbrik mətnində deyilir:
Azərbaycan Respublikasının Prezidenti Zati-aliləri cənab İlham Əliyevə
Zati-aliləri, hörmətli cənab Prezident.
Yenidən Azərbaycan Respublikasının Prezidenti seçilməyiniz münasibətilə ən səmimi təbriklərimi qəbul edin.
Bu xoş fürsətdən istifadə edərək Azərbaycan ilə Yaponiya arasında mövcud olan səmimi ikitərəfli əlaqələrin möhkəmləndirilməsində böyük səylərinizi vurğulamaq istərdim.
Sizə möhkəm cansağlığı və Azərbaycan Respublikasının daha da inkişaf etdirilməsi istiqamətində ali dövləti fəaliyyətinizdə uğurlar arzu edirəm.
Hörmətlə,
Koişiro Matsuura
UNESCO-nun sabiq baş direktoru
Bundan başqa “Yapı Kredi Bank Azərbaycan”ın İdarə Heyətinin sədri, baş direktor Cenk Yüksel də Azərbaycan Respublikasının Prezidenti İlham Əliyevə təbrik məktubu ünvanlayıb.
"Ölkə.Az"ın məlumatına görə, təbrik mətnində deyilir:
Azərbaycan Respublikasının Prezidenti Zati-aliləri cənab İlham Əliyevə
Hörmətli cənab Prezident.
Sizi yenidən Azərbaycan Respublikasının Prezidenti seçilməyiniz münasibətilə “Yapı Kredi Bank Azərbaycan” adından təbrik edirik. Sizin yorulmaz səyləriniz, uzaqgörənliyiniz və apardığınız siyasət sayəsində Azərbaycan sosial-iqtisadi sahədə, dövlət quruculuğunda və beynəlxalq aləmdə uğurlar qazanmışdır.
Bu xoş fürsətdən istifadə edib, Sizə və ailənizə möhkəm cansağlığı, işlərinizdə uğurlar və qardaş Azərbaycan xalqına rifah arzu edirəm.
Hörmətlə,
Cenk Yüksel
“Yapı Kredi Bank Azərbaycan”ın İdarə Heyətinin sədri, baş direktor
***
Həmçinin İsrail Dövlətinin Baş naziri Benyamin Netanyahu da prezident İlham Əliyevi təbrik məktubu ünvanlayıb.
“Ölkə.Az”ın xəbərinə görə, təbrik mətnində deyilir:
“Hörmətli cənab Prezident, əziz dostum.
Azərbaycan Respublikasının Prezidenti vəzifəsinə ardıcıl olaraq dördüncü dəfə seçilməyiniz münasibətilə İsrail hökuməti adından mənim səmimi təbriklərimi qəbul edin.
İsrail ilə Azərbaycan arasında sıx dostluq və əməkdaşlıq münasibətlərini daha da möhkəmləndirmək üçün bundan sonra da Sizinlə əlaqələrimizi davam etdirmək niyyətindəyik.
Bu xoş fürsətdən istifadə edərək Sizə münasib olan vaxtda İsrailə səfər etməyiniz barədə təklifimi yenidən ali diqqətinizə çatdırıram. 2016-cı ilin dekabrında Bakıya unudulmaz səfərim zamanı Sizin mənə göstərdiyiniz səmimi münasibətə və qonaqpərvərliyə görə Sizə bir daha dərin təşəkkürümü bildirirəm.
Zati-aliləri, Sizi ən qısa zamanda yenidən görməyə ümidvaram”.
***
Pakistan İslam Respublikasının Prezidenti Məmnun Hüseyn Azərbaycan Respublikasının Prezidenti İlham Əliyevə təbrik məktubu ünvanlayıb.
"Ölkə.Az"ın məlumatına görə, təbrik mətnində deyilir:
"Zati-aliləri.
Yenidən Azərbaycan Respublikasının Prezidenti seçilməyiniz münasibətilə Sizə ən səmimi təbriklərimi çatdırmaqdan böyük məmnunluq duyuram. Ölkə rəhbəri kimi yüksək vəzifəyə yenidən seçilməyiniz təkcə Azərbaycan xalqının Sizə bəslədiyi etimadın göstəricisi deyil, eyni zamanda, Azərbaycan Respublikasının inkişafı naminə verilmiş mandatdır.
Pakistan və Azərbaycan strateji tərəfdaşlar olmaqla yanaşı, onlar həm də aralarında qədim mədəniyyət bağları və ortaq adət-ənənələri olan qardaş dövlətlərdir. Zati-aliləri, Sizin ötən ilin mart ayında Pakistana səfəriniz ölkələrimiz arasında mövcud olan dostluq və xeyirxah münasibətlərə əlavə stimul verdi. Ölkələrimiz arasındakı ikitərəfli əlaqələri Pakistan və Azərbaycan xalqlarının ortaq maraqları naminə bundan sonra da möhkəmləndirmək istiqamətində Sizinlə yaxından işləmək niyyətindəyik.
Yaranmış imkandan istifadə edərək Sizə möhkəm cansağlığı və xoşbəxtlik, Azərbaycan xalqına isə davamlı inkişaf və yüksəliş arzulayıram.
Zati-aliləri, ən yüksək ehtiramımı qəbul etməyinizi xahiş edirəm".
***
İslam Təhsil, Elm və Mədəniyyət Təşkilatının (ISESCO) baş direktoru Əbdüləziz Osman əl-Tuveycri Azərbaycan prezidenti İlham Əliyevə təbrik ünvanlayıb.
"Ölkə.Az"ın xəbərinə görə, təbrikdə deyilir: “Zati-aliləri.
Yenidən Azərbaycan Respublikasının Prezidenti seçilməyiniz münasibətilə Sizə ən səmimi təbriklərimi çatdırmaqdan məmnunluq duyuram.
Gözəl ölkənizdə əldə etdiyiniz misilsiz nailiyyətlərə görə Sizi təbrik etməkdən şərəf duyur və Qüdrətli Allahdan xalqınızın daha böyük tərəqqi arzularını yerinə yetirmək üçün ali dövləti vəzifənizdə böyük uğurlar diləyirəm”.
***
Belçikalıların kralı Filip İlham Əliyevi Azərbaycan prezidenti seçilməsi münasibəti ilə təbrik edib.
"Ölkə.Az"ın məlumatına görə, təbrikdə deyilir:
“Zati-aliləri. Sizi Azərbaycan Respublikasının Prezidenti seçilməyiniz münasibətilə təbrik edir, ali dövləti vəzifənizdə uğurlar diləyirəm. Ölkələrimizi birləşdirən dostluq əlaqələrinin möhkəmləndirilməsi, Azərbaycanın rifahı və bütün soydaşlarınızın xoşbəxtliyi üçün ən xoş arzularımı çatdırıram”.
