Ümumrusiya Azərbaycan Konqresinin fəaliyyəti bərpa edilir

Bu barədə "Ölkə.Az"a eksklüziv açıqlamasında Azərbaycandakı Rus İcmasının rəhbəri, Milli Məclisin deputatı Mixail Zabelin məlumat verib. 

Mixail Zabelin deyib ki, Ümumrusiya Azərbaycan Konqresinin fəaliyyəti 14 iyun 2018-15 iyul 2018 tarixləri arasında Rusiyada keçiriləcək FİFA Dünya Kubokundan dərhal sonra bərpa olunacaq:

"Artıq sənədlər hazırlanaraq Rusiya tərəfinə təqdim edilib. Rusiya tərəfi isə müraciətimizə müsbət cavab verib. Bu ilin sonuna qədər Konqres fəaliyyətini davam etdirə biləcək. Ancaq Ümumrusiya Azərbaycan Konqresi başqa adla fəaliyyət göstərəcək".

Xatırladaq ki, 2017-ci il mayın 15-də Rusiya Ali Məhkəməsində Ümumrusiya Azərbaycan Konqresinin (ÜAK) qeydiyyatının ləğv edilməsi barədə Rusiya Ədliyyə Nazirliyinin iddiası üzrə proses davam etdirilib.

Ali Məhkəmə Ədliyyə Nazirliyinin iddiasını təmin edərək, ÜAK-ın qeydiyyatının ləğvi barədə qərar verib.

Onu da bildirək ki, Ümumrusiya Azərbaycan Konqresi 2001-ci ildə Azərbaycanın keçmiş prezidenti Heydər Əliyev və Rusiya prezidenti Vladimir Putinin dəstəyi ilə yaradılıb. Konqres Azərbaycanın xarici ölkələrdəki ən böyük diaspor təşkilatıdır. Qurumun Rusiyanın 80-dən çox bölgəsində şöbələri vardı.

Vasif Həsənli
Ölkə.Az