Bayram Səfərov: “Danışıq aparmaq üçün erməni tərəfində adam tapa bilmirik”
“İcmalar səviyyəsində danışıq aparmaq üçün erməni tərəfində adam tapa bilmirik. Belə getsə, Dağlıq Qarabağın Azərbaycan və erməni icmaları arasında görüş olmayacaq”.
Bu fikirləri “Ölkə.Az”a açıqlamasında Şuşa Rayon İcra Hakimiyyətinin başçısı, Dağlıq Qarabağın Azərbaycanlı İcmasının rəhbəri Bayram Səfərov bildirib.
Bayram Səfərov deyib ki, hələlik icmalar səviyyəsində heç bir görüşün keçirilməsi gözlənilmir:
“Axı biz erməni tərəfindən kiminlə danışaq? Gərək qarşı tərəf danışıqlara hazır olsun da! Biz hər zaman danışıqlara hazırıq. Torpaqlarımızı işğaldan azad etmək üçün ölümə də, sülhə də getməyə hazırıq”.
İcma rəhbəri qeyd edib ki, Ermənistanda hakimiyyət yeni dəyişsə də, Azərbaycan tərəfi Nikol Paşinyanın yürüdəcəyi siyasətə adekvat addımlar atacaq.
Vasif Həsənli
Ölkə.Az
