"Ərdoğan Azərbaycan təhsilinə böyük zərbə vurub"

Türkiyənin yeni seçilmiş prezidenti Rəcəb Tayyib Ərdoğanın andiçmə mərasimindən sonra ilk xarici səfərini Azərbaycana etdi. Türkiyənin ilk xalq tərəfindən seçilmiş prezidenti, uzun illərdir türk siyasətinin ən nüfuzlu lideri adını qoruyan Ərdoğanın Azərbaycan səfərini millət vəkilləri Fazil Mustafa və Zahid Oruc Ölkə.az-a şərh etdilər.

Fazil Mustafa: Türkiyədə prezident seçkilərindən sonra Ərdoğanın ilk olaraq Azərbaycana gəlməsi ənənəvi bir haldır. Türkiyədə AKP haqqında belə bir imic formalaşıb ki, Ərdoğan ərəb dünyasına daha çox qayğı göstərir, onların problemləri ilə məşğul olur. Ona görə də o, imicini fərqli göstərmək üçün Türk dünyasına, Azərbaycana əhəmiyyət verdiklərini göstərmək üçün ilk səfərini Bakıya edir. Onun bu addımı da başa düşüləndir.

Bu səfərdən başqa nə isə gözləmək olmaz. Ərdoğan onsuz da Azərbaycan üçün etdiyini edib. Məktəblərin bağlanması prosesi başa çatıb. Azərbaycan təhsilinə böyük zərbə vurulub. Bütün hallarda Ərdoğanın Azərbaycan səfəri Azərbaycan-Türkiyə münasibətləri üçün faydalıdır.

Zahid Oruc: Ərdoğan Türkiyə siyasətində uzun illər fəaliyyət göstərən və uğur qazanan bir şəxs kimi prezidentlik dönəminin ilk səfərini Azərbaycana həyata keçirdi. Türkiyənin Azərbaycana etdiyi jestin sadəcə simvolik mənası yoxdur. Bunun mühüm bir siyasi, iqtisadi, hərbi, təhlükəsizlik kimi əhəmiyyəti mövcuddur və regionda formalaşan son vəziyyət sübut edir ki, hər iki ölkə prezidentlərinin tez-tez etdiyi səfərlər və görüşləri hər iki ölkənin maraqlarına xidmət etməkdədir. Ərdoğanın səlahiyyəti prezident olanda fərqlidir ancaq onun komandasından olan Davudoğlunun baş nazir seçilməsi, həmçinin Azərbaycanla çox yaxın təmaslara malik olan və Avropa Şurasında ümumi mənafelərimiz urunda mübarizə aparan Mövlud Çavuşoğlunun xarici işlər naziri təyin edilməsi sübut edir ki, iki ölkənin siyasi elitası yaxın əməkdaşlıq formatına qədəm qoyublar.

Azərbaycanın ən ağrılı yeri olan Qarabağ probleminin həlli məsələsi Türkiyə dövləti üçün ən öndəgələn məsələdir. Bu səfərin ən önəmli cəhəti ondadır ki, bu görüş zamanı regional siyasət, mövcud vəziyyət, Qafqazdakı durum və Türkiyə üçün təhlükə məsələləri müzakirə olunacaq.

Dünyada 130 ölkdə olan ÇAĞ öyrətim məktəblərdən yalnız Azərbaycanda və Rusiyanın bir neçə yerində bağlandı. Buna görə Azərbaycana hədələr yağdırmaq, o cümlədən biz sizlərə 90-cı illərdə yaxşılıq etmişdik siz bunu bizə yamanlıq kimi qaytardınız deyə dərd halına gətirmək yanlışlıqdır. Ərdoğanın səfərinin başlıca mövzusu həmin məktəblər və bu məsələlər deyil.

Səxavət Məmməd

Ölkə.az