\"Əgər Ukrayna problemi olmasaydı, Merkeli çarmıxa belə çəksəydilər o, bu sözləri deməzdi\"

"Biz beynəlxalq təşkilatlardan Ermənistanı sülhə məcbur etməyi gözləyirik".

Prezident İlham Əliyevlə Almaniya kansleri Angela Merkel arasında danışıqlardan sonra keçirilən mətbuat konfransında Merkelin Qarabağa dair sensasion bəyanatlarına Araz Əlizadə və Asim Mollazadədən maraqlı şərh gəlib.

Ölkə.az-a danışan partiya sədrlərinin fikirlərincə, kansler Merkelin Dağlıq Qarabağ münaqişəsi zonasında artan gərginliyə görə Rusiyanı günahlandırması Avropanın artıq həqiqətləri görməsi deməkdir.

Araz Əlizadə: "Angela Merkelin sözləri bütünlüklə doğrudur. Əgər Rusiya olmasaydı, onlar bir qarış torpağı belə işğal edə bilməzdilər. Amma bir məsələ də var ki, dünyanın hazırki, siyasi mənzərəsi tələb edir ki, bütün siyasi günahları Rusiyanın üzərinə yıxsınlar. Ona görə də həqiqəti deməyə məcburdurlar. Əgər Krım, Donbas, Luqanks məsələsi olmasaydı, Angel Merkeli çar-mıxa çəksəydilər də o bu sözləri deməzdi".

Asim Mollazadə: "Nəhayət Avropa anladı ki, keçmiş SSRİ arasında olan münaqişələrin hamısı eyni ssenari üzrə həyata keçirilib. Ukraynadakı hadisələrdən qabaq Moldova, Gürgüstan və ən birinci Qarabağ münaqişəsi olub. Və bunların hər biri eyni ssenari ilə həyata keçirilib. Təbii olaraq bu münaqişələr öz həllini tapa bilmir. Ermənistan öz müstəqilliyini çoxdan itirib. Buna görə də danışıqlar prosesində heç bir dəyişikliklər yoxdur. Angela Merkelin etdiyi bu etiraflar onu göstərir nəhayət bu münaqişənin mahiyyətini daha gözəl anlayıb. Biz beynelxalq təşkilatlardan ermənistanı sülhə məcbur etməyi gözləyirik".

Qeyd edək ki, Merkel çıxışında Rusiya Qarabağ münaqişəsinin qızışmasında neqativ rol oynadığını bildirmişdi. Bununla yanaşı o, atəşkəsin tez-tez pozulması hallarında da Rusiyanın müəyyən rol oynadığını səsləndirmişdi.

Fatimə İbrahimova
Ölkə.az