Ermənistan vurulan helikopterlə bağlı səhvini etiraf etdi

Ermənistanın müdafiə naziri Seyran Ohanyan ötən ilin noyabrında Azərbaycan Silahlı Qüvvələri tərəfindən vurulan helikopterin kursdan çıxdığını etiraf edib.

Ölkə.Az qafqazinfo-ya istinadən xəbər verir ki, nazir baş verən insidentlə bağlı təhqiqat aparıldığını, səlahiyyətli şəxslərin töhmət aldığını, həmçinin işdən qovulanların olduğunu deyib.

Ohanyan təlim uçuşu həyata keçirən helikopterin kursdan kənara çıxdığını etiraf etsə də, bütün hallarda atəşkəs rejimini pozduğu və helikopteri vurduğu üçün Azərbaycan tərəfini günahlandırıb.

Xatırladaq ki, Ermənistan Silahlı Qüvvələrinə məxsus “Mi-24” tipli helikopter təlim zamanı Azərbaycan mövqelərinə hücum cəhdi etmiş, lakin əsgərlərimizin açdığı atəş nəticəsində içərisində 3 pilot olan helikopter məhv edilmişdi.

Ölkə.Az