Politoloq girovlarımızdan danışdı: \"Hərəkətə keçmək lazımdır\"

"Girovlarımızın hüquqlarının müdafiəsi ilə bağlı müxtəlif təsir üsullarına əl atmaq lazımdır..."

Xəbər verdiyimiz kimi moldovalı ombudsman Aureliya Qriqoriu ermənilərin əlində girov olan Dilqəm Əsgərov və Şahbaz Quliyevi müdafiə edəcək.

Mövzu barədə Ölkə.az-a danışan politoloq Elman Nəsirov bütün imkandan istifadə etmək üçün hərəkətə keçmək lazım olduğunu bildirdi.

"Düşünürəm ki, ermənilərin əlində girov olan Dilqəm Əsgərov və Şahbaz Quliyevin hüquqlarının müdafiəsi ilə bağlı müxtəlif təsir üsullarına əl atmaq lazımdır. Bu prosesdə nüfuzlu xarici ölkə vəkilləri və hüquq müdafiəçilərinin xidmət və imkanlarından səmərəli istifadə olunmasına böyuk ehtiyac var. Hesab edirəm ki, hadisələrə öz obyektiv yanaşması və ədalətli mövqeyi ilə nəinki Moldovada, eləcə də onun hüdudlarından kənarda, o cümlədən Azərbaycanda kifayət qədər tanınmış ombudsman Aureliya Qriqoriunun dəstəyi olduqca faydalı ola bilər.

Ən başlıcası, Aureliya xanım vicdanının səsi ilə artıq bu ağır prosesdə azərbaycanlı girovların hüquqlarının müdafiəsi məsələsini avropalı hüquq müdafiəçiləri arasında qaldırmağa hazır olduğunu bildirib. Bu məsələdə Aureliya xanımın sadəcə bir istəyi vardır - məlum hadisə ilə bağlı geniş informasiya ilə təmin etmək.

Deməli, bu imkandan da istifadə etmək üçün hərəkətə keçmək lazımdır. Paralel digər imkan və vasitələr də axtarılıb tapılmalıdır. Bütün bu addımların koordinasiya olunmuş şəkildə həyata keçirilməsi bir "X" anında nəticənin əldə edilməsini labüd edir. Bu nəticəyə inanmaq və çevik taktiki gedişlər hesabına hədəfə çatmaq lazımdır".

Xatırladaq ki, Aureliya Qriqoriu separatçı Dağlıq Qarabağ rejiminin qeyri-qanuni ittiham etdiyi azərbaycanlı girovların hüquqlarının müdafiəsi məsələsini avropalı hüquq müdafiəçiləri arasında qaldırmağa hazır olduğunu bildirib.

Ölkə.Az