“Bankların fəaliyyətindən razı qala bilmərik”
"Ölkə.Az" xəbər verir ki, büdcə haqqında deputatlara İqtisadi siyasət, sənaye və sahibkarlıq komitəsinin sədri Ziyad Səmədzadə məlumat verir.
Komitə sədri deyib ki, Azərbaycan dövlətinin gəlirlərinin ildən-ilə artması üçün kifayət qədər imkanlar var. Atılan addımlar şübhəsiz ki, öz nəticəsini göstərəcək:
“Dövlət xərcləri dinamik artır və bütövlıükdə iqtisadiyyat dəyişib, infrastruktur yenilənib. 2010-cu illərə qədər dövlət xərcləri 10-12 faiz təşkil edirdi. Son illər dövlətlər dövlət xərcləri ÜDM 30-40 faizini təşkil edir.
Azərbaycan iqtisadiyyatı infrastruktur, sosial obyektləri istifadəyə verdikcə büdcənin xərclərinin optimal artacaq. Komitə hesab edir ki, büdcə xərcləri ÜDM 34-335 faizini təşkil etməlidir.
Büdcə xərclərinin dinamikası və xərcləri deputatlara təqdim edilən sənədlərdə öz əksini tapıb. Bizim fikrimiz belədir ki, tədricən dövlət büdcəsi xərclərində cari xərcləri 1-2 faiz artırmalıyıq”.
Komitə sədri əlavə edib ki, Azərbaycan iqtisadiyyatı özünün yeni inkişaf mərhələsinə keçir, qloballaşan dünyada, risklərin artdığı bir şəraitdə öz davamlılığını nümayiş etdirir:
“Heç şübhəsiz, bu nailiyyətlərin əldə olunmasının əsasında Prezident İlham Əliyev tərəfindən aparılan düşünülmüş iqtisadi siyasət, ölkənin milli maraqlarına cavab verən iqtisadi inkişaf strategiyası dayanır. Dövlət büdcəsi bütün bu nailiyyətlərin əldə olunmasında mühüm bir vasitədir. Büdcənin hazırlanmasında iştirak edən strukturlar bu məsələyə kifayət qədər məsuliyyətlə yanaşırlar. Məhz belə yanaşmanın nəticəsidir ki, Azərbaycanın dövlət büdcəsinin göstəriciləri ildən-ilə yaxşılaşır”.
Daha sonra komitə sədri deyib ki, qeyri-neft sektorunun mahiyyəti açıqlanmalıdır:
“Neft emalı zavodları qeyri-neft sektoruna aid edilməlidir. Bir çox ölkələrdə bu cürdür. Yanlış olaraq Azərbaycanı neftdən asılı ölkə hesab edirlər. Mahiyyətdə belə deyil. 1,3 milon kilovat elektrik enerjisi ixrac edirik. Ölkənin enerji sisteminin möhkəmliyi müstəqilliyin açarıdır. Bir müddət əvvəl baş verən qəzanın obyektiv və subyektiv səbəbləri vardı. Həmin qəzadan sonra prezidentin tapşırığı ilə dövlət komissiyası yaradıldı və sistem tam dəyişdi. Bu gün elektrik enerjisi sektorunda yığım 98 faizə çatıb. Bu da qoyulan vəsaitlərin geriyə qayıtdığını göstərir”.
Komitə sədri əlavə edib ki, aqrar sahədə görülən işlər dinamika nümayiş etdirir:
“Dövlət büdcəsindən bu sahəyə 1,5 milyard subsidiya ayrılıb. Bizim komitə hesab edir ki, aqrar sektora dəstək göstərilməli, amma bununla paralel məhsuldarlıq artmalıdır. Büdcənin formalaşmasında proqram layihələrindən istifadəsi çox şeydən xəbər verir. Azərbaycanda özəl sektor, sahibkarlıq ölkənin resursuna çevrilir. Bu müsbət haldır. Sahibkarlığın inkişafına maneə olan səbəbləri aradan qaldırmaq üçün hamımız birlikdə çalışmalıyıq. Biz bankların fəaliyyətindən razı qala bilmərik. Bankların real sektorunda payı azdır. Bank faziləri yüksəkdir. Biz toplaşıb bir qərara gəlməli, faiz dərəcəsini azaltmalıyıq”.
Dövlət borcu haqqında danışan komitə sədri söyləyib ki, bu istiqamətdə nikbinlik var:
“Prezident bu sahə ilə bağlı ciddi fəaliyyət göstərir. Bundan sonra borcların götürülməsinə ciddi nəızarət olacaq. Biz bir çox ölkələrə investisiyalar qoyuruq. Vaxtı ilə 1 manat borc verməyə pulu olmayan Azərbaycan bu gün xarici ölkələrə 20 milyarddan çox vəsait qoyub”.
Sonda Ziyad Səmədzadə deyib ki, 2019-ci ilin büdcəsi müdafiə qabiliyyətinin artırılmasına, sosial problemlərin həllinə səbəb olacaq.
Vasif Həsənli
Ölkə.Az
