"Artıq Rusiya da başa düşür ki, Ermənistandan heç vaxt sadiq dost, tərəfdaş olmayacaq"
Bir neçə gün bundan öncə hazırda Rusiyada yaşayan erməni əsilli akademik Abel Aqanbekyan Ermənistan və əhalisi barədə maraqlı fikirlər səsləndirib.
O, Ağdamı Azərbaycan şəhəri adlandırmaqla yanaşı, Dağlıq Qarabağda separatçılığın yaranmasında özünü günahkar saymadığını bildirib. Çıxışında maraqlı məqamlara toxunan Abel Aqanbekyan Ermənistan əhalisinin yoxsulluq səbəbi ilə ölkəni kütləvi tərk etməsi barədə də danışıb.
Ölkə.az-a danışan Azərbaycan Qaçqınlar Cəmiyyətinin sədri, fəlsəfə doktoru Əziz Ələkbərlinin fikrincə, Ermənistan əhalisinin yoxsulluqdan ölkəni kütləvi şəkildə tərk etməsi barədə xəbərlər artıq adiləşib.
"Artıq neçə illərdir ki, bu barədə informasiyalar, rəsmi məlumatlar yayılmaqdadır. Yadınızdadırsa, bir müddət əvvəl bunu ictimaiyyətlə, mediya nümayəndələri ilə görüşdə Rusiya prezidenti Vladimir Putin də səsləndirmişdi. Lakin bunu “Dağlıq Qarabağ” probleminin memarlarından biri, həm də iqtisadçı akademik Aqanbekyanın səsləndirməsi artıq məsələnin daha ciddi şəkil almasından, ermənilərin cidd-cəhdlərinə baxmayaraq, məsələni gizlətməyin artıq daha mümkün olmamasından xəbər verir. Nəhayət, erməni liderləri etiraf etməyə başlayıblar ki, Ermənistan iqtisadi və siyasi uçurum qarşısındadır. Bu, illərdən bəri ermənilərin Azərbaycana, Türkiyəyə və hətta Gürcüstana qarşı haqsız torpaq iddialarının iflası deməkdir.
Ermənistanın hazırkı böhran vəziyyəti xüsusilə iki amildən qaynaqlanır. Bunlardan biri daxili, ikincisi xarici amildir. Daxili amil ondan ibarətdir ki, Ermənistan və erməni xalqı Ter-Petrosyanın istefasından sonra artıq neçə illərdir ki, Köçəryan və Sarkisyanın timsalında Qarabağ separatçılarının işğalı altındadır. Onlar Ermənistanı və erməni xalqını özlərinin məhdud maraqları və müharibə təzyiqi altında, müharibə qorxusu içində saxlayırlar. Xalq artıq bu vəziyyətdə yaşaya bilmir və yaşamaq istəmir, çünki görür ki, bunun sonu yoxdur.
Xarici amil isə ondan ibarətdir ki, Ermənistan müstəqil dövlət deyil və Rusiyanın maraqlarına tabedir və bu maraqlar heç də həmişə Ermənistanın və erməni xalqının maraqları ilə üst-üstə düşmür. Bunu Gümrüdə baş verən son hadisələr də təsdiq etdi. Artıq Rusiya da başa düşür ki, Ermənistan və erməni xalqı heç vaxt sadiq dost və sadiq tərəfdaş olmayıb və ola da bilməz. Kim nə vaxt onların qabına bir az artıq yal töksə, erməni dərhal əvvəlki sahibinə arxa çevirib, yeni sahibinə doğru qaçacaq. Son zamanlar Rusiyanın beynəlxalq güclər tərəfindən təkləndiyini, iqtisadi cəhətdən zəiflədiyini görən ermənilər artıq ölkəni tərk etməyi tərcih ediblər. Ermənistanda təcili siyasi dəyişikliklər olmasa, çox çəkməz ki, Ermənistan və ermənilər bir dövlət və bir millət olaraq özlərinin mövcudluq məsələsi üzərində düşünməli olacaqlar".
Qeyd edək ki, Abel Aqanbekyan Dağlıq Qarabağın Azərbaycandan ayrılaraq Ermənistana birləşdirilməsinin təşəbbüskarlarından biri olub. O, hətta "yenidənqurma" dövründə Mixail Qorbaçovun iqtisadi məsələlər üzrə müşaviri vəzifəsində də çalışıb.
Fatimə İbrahimova
Ölkə.az
