Zərdüşt Əlizadə: "Artıq dünyanın axırıdır"

"Ukrayna naminə Qərb müharibəyə gedərsə, nə Amerika qalacaq, nə Rusiya, nə də ki, Ukrayna"

Bir neçə gün bundan öncə ABŞ Dövlət Departamentinin nümayəndəsi Cen Psaki müsahibəsində bütün dünyanı şoka salan fikirlər səsləndirib.

Məlumatlara görə, Cen Psaki ABŞ-ın Rusiyanın Ukraynadakı dağıdıcı fəaliyyətinə son qoymaq niyyətində olduğunu və bu baş verməzsə, müharibənin qaçılmaz olduğunu bildirib.

Dünyada xüsusi söz sahibləri olan Rusiya və Amerika arasında baş verən gərginliyin aqibətini Ölkə.az-a politoloq Zərdüşt Əlizadə şərh edib.

"Amerika və Rusiya arası müharibə baş verərsə, bu qorxunc sonluqla bitə bilər. Bu o deməkdir ki, artıq dünyanın axırıdır.

Nəzərə almaq lazımdır ki, bu iki nüvə silahı olan dövlətdir. Əgər onlar arası müharibə başlayarsa, bu yer kürəsinin məhvi deməkdir. Amerika ilə Rusiya arasında müharibə olsa, ondan sonra yer kürəsində insan qalmayacaq demək.

Ümumilikdə isə bu müharibənin baş verməsinə inanmıram, çünki hər iki tərəf ölmək istəməz. Ortada mübahisə predmeti Ukraynadır. Məgər Ukrayna bir dəyərdimi ki, Amerika buna görə Yer kürəsində həyata son qoysun?

Mən Ukraynanı dünya müharibəsinə səbəb olacaq dəyərli nəsnə hesab etmirəm.

Son olaraq onu deyə bilərəm ki, Ukrayna naminə Qərb müharibəyə gedərsə, nə Amerika qalacaq, nə Rusiya, nə də ki, Ukrayna".

Qeyd edək ki, Cen Psaki çıxışında Rusiyanın bu ölkəyə müdaxiləsini qanunsuz adlandırıb. ABŞ Dövlət Departamentinin nümayəndəsi beynəlxalq ictimaiyyətin bir qolu kimi ABŞ-ın baş verənləri kənarda dayanıb seyr etməsinin mümkün olmadığını bildirib.

Fatimə İbrahimova
Ölkə.az