İskəndər Həmidov: "Müharibəsiz heç bir torpaq azad olunmayacaq"

"Cəbhədəki gərginlik Rusiyanın  Azərbaycanı “Gömrük ittifaqı”na qoşulmağa məcbur etmək cəhdidir"

Son zamanlar cəbhədə artan gərginlik, Rusiyanın təşkilatçılığı ilə Azərbaycan, Ermənistan prezidentlərinin görüşü və görüşün nəticələrini tanınmış siyasətçilər İskəndər Həmidov və Zərdüşt Əlizadə Ölkə az-a şərh etdilər.

Zərdüş Əlizadə: Rusiya istəyirdi ki, bu vəziyyət indiki şəkildə davam etsin. Bizim hakimiyyətin istədiyi isə budur ki, Qarabağ münaqişəsindən istifadə edərək xalqı itaətdə saxlasın. Ermənilərin də istəyi odur ki, Qarabağda qazandığı qələbəni rəsmiləşdirsinlər və torpaqları alsınlar. Azərbaycan xalqı isə birinci müharibəni uduzub və ancaq Qarabağın geri qaytarılmasını istəyir. Rusiya da istəyirdi ki, tərəflər bir biri ilə vuruşub bir-birini gücdən salıb gəlib ondan imdad istəsinlər. Əslində hər bir tərəf istədiyinə çatdı. Rusiya göstərdi ki, tərəfləri müharibədən saxlaya bilər, tərəflər ondan aslıdır. Soçi görüşündə Ermənistan qarantiya aldı ki, Qarabağ onların tərkibində qalır. Azərbaycan isə sübut etdi ki, Rusiyanı sevən bir ölkədir. Soçi görüşündən sonra münaqişə dondurulmuş vəziyyətdə qaldı. Son günlər cəbhədə baş verən atışmalar Rusiyanın oyunu idi və bunu Rusiya təşkil etmişdi ki, Ukrayna məsələsindən diqqət yayındırsın. Ən əsası isə dünyaya bildirmək istədi ki, keçmiş postsovet məkanında yeganə ağa odur.

İsgəndər Həmidov: Soçi görüşü növbəti görüşlərdən biri oldu və nəticəsi də olmadı. Putin bütün dünyaya, Azərbaycana və Ermənistana mesaj verdi ki, “Qarabağın açar”ı məndədir. Putinin prezidentlərlə danışığında qəribə bir nüans diqqətimi çəkdi. Putin İlham Əliyevə bildirdi ki, görüşdə "Qarabağ məsələsini", Sərkisiyana isə "Dağıq Qarabağ məsələsini" müzakirə edəcəklərini bildirdi. Qarabağın müzakirə olunması o deməkdir ki, Dağlıq Qarbağ ətrafı ərazilər müzakirə olunacaq. Bu danışıqların heç bir nəticəsi olmadı, heç ola da bilməzdi. Danışıqların sonunda bildirdilər ki, məsələ sülh yolu ilə həll olunacaq. 20 ildir bu sülh yolu ilə məsələ həll edirlər ancaq həll edib qurtara bilmirlər. Cəbəhdə baş verənlər Rusiyanın diktəsi ilə edilmişdir. Rusiyanın bunu etməkdə məqsədi Azərbaycanı “Gömrük ittifaqı”na qoşulmağa vadar etməkdir. İlham Əliyev hələ ki, buna getmir. Əgər Azərbaycan bu ittifaqa qoşulsa bu bizim məhvimiz deməkdir. Müharibəsiz heç bir torpaq azad olunmayacaq. 5 rayon azad olunsa da Dağlıq Qarabağ qaytarılmayacaq və Azərbaycana diqtə edəcəklər ki, Dağlıq Qarabağı müstəqil respubilka kimi tanı. Qarabağ məsələsinin eynisini Rusiya Ukraynada yaradır və Donetsk, Luqanskı Ukraynanın başının üstündə asılı qılınc kimi saxlayacaqlar. Danışıqlar mənasız, faydasızdır və o danışıqlara getmək lazım deyil.

Səxavət Məmməd

Ölkə.az