“Əliyevlə hüquq müdafiəçiləri məsələsində razılığa gəldik”
“Əliyevlə hüquq müdafiəçiləri məsələsində razılığa gəldik”; İşçi Qrupunun fəaliyyəti bərpa olunur; hüquq sahəsinin adamları bu anlaşmanı pozitiv dəyərləndirir
Bazar ertəsi səhər - avqustun 11-də Avropa Şurasının baş katibi Tyornborn Yanqland prezident İlham Əliyevə zəng edib. Baş katib söhbətin yekunlarına görə bəyanat yayıb.
Bəyanatda deyilir: “Azərbaycan prezidenti ilə telefon söhbətində mən son günlər məşhur hüquq müdafiəçilərinin həbsi ilə bağlı dərin narahatlığımı bildirdim.
Biz Prezident Administrasiyasının və vətəndaş cəmiyyətinin nümayəndələrindən ibarət İşçi Qrupun fəaliyyətinin bərpa edilməsi barədə razılıq əldə etdik. Bu qrup 2003-cü ildə təsis edilmişdi və 2008-ci ilə qədər fəaliyyət göstərdi. İşçi Qrupun fəaliyyəti Avropa Şurası nümayəndələrinin iştirakı ilə bərpa edilib.
Bu qurumun bərpası yaxın günlərdə baş tutacaq və hüquq müdafiəçilərinə qarşı irəli sürülmüş ittihamların yoxlanılması, habelə hakimiyyət və vətəndaş cəmiyyəti arasında dialoqun başlanması üçün yaxşı imkan olacaq".
Hüquq sahəsinin adamları ilə bu məsələ ətrafında danışarkən onlar bildirdilər ki, Yanqlandın prezidentə bu məsələyə görə telefon açmasını vətəndaş cəmiyyəti institutlarına təqiblərdən ciddi narahat olması anlamına gəlir. AŞ katibinin bəyanatında əksini tapan məsələlər həbsdəki hüquq müdafiəçilərinin dərhal azad olunacağı anlamına gəlməsə də, bu, QHT sektoru ilə bağlı prosesin durdurulacağını düşünməyə əsas verir.
Hüquq müdafiəçiləri hesab edir ki, bu anlaşma ciddi hadisədir və vətəndaş cəmiyyət institutlarına münasibətin dəyişməsinə səbəb ola bilər. Eyni zamanda onlar ümid edir ki, həbsdəki hüquq müdafiəçilərinin maksimum tez azadlığa buraxılması da bu anlaşmanın fonunda mümkündür. Hər bir halda, İşçi Qrupun fəaliyyətinin bərpa edilməsi bu sahədəki vəziyyətin yaxşılaşmasına gətirib çıxaracaq.
Hüquq müdafiəçiləri hesab edir ki, bu anlaşmanın əldə edilməsi ölkə başçısının da gərginliyin aradan qaldırılmasında maraqlı olduğu qənaətini formalaşdırır./Turan/
Ölkə.Az
