Soçidə prezidentlərin üçtərəfli görüşü keçirilib

Rusiya prezidenti Vladimir Putin hesab edir ki, Dağlıq Qarabağ münaqişəsinin həlli üçün səbrli, müdrik olmaq və bir-birinə hörmət bəsləmək lazımdır.

“Biz münaqişənin həlli yolunu tamaq üçün səbrli, müdrik olmalı, bir-birimizə hörmət etməliyik”, - deyə, o, bu gün Azərbaycan Prezidenti İlham Əliyev və erməni dövlət başçısı Serj Sarkisyanla görüşdə bildirib.

Putin hər iki prezidentin problemi sülh yolu ilə həll etmək niyyətləri barədə sözlərinə müsbət münasibət bildirib:

“Əsas olan budur, çünki insanların ölməsindən böyük faciə yoxdur”, - deyə, Rusiya prezidenti vurğulayıb.

O xatırladıb ki, münaqişə xeyli müddətdir, Sovet İttifaqının mirası kimi formalaşıb.

“Şübhəsiz, istənilən çətin vəziyyətlər həll oluna bilər - əgər xoş məram varsa; həm Azərbaycan xalqı, həm də erməni xalqı tərəfindən belə xoş iradə var”, - deyə, Putin qeyd edib.

Rusiya prezidenti vurğulayıb ki, Əliyev və Sarqsyanla dünən baş tutan ikitərəfli görüşlərdən sonra liderlər axşam qeyri-rəsmi şəraitdə daha bir görüş keçiriblər.

“Axşam (şənbə günü) qeyri-rəsmi də söhbət etdik. Düzdür, Allaha şükür biz dünən axşam işgüzar məsələlərə toxunmadıq, lakin bununla belə, bir-birimizlə müxtəlif mövzularda söhbətləşmək imkanları var idi”, - deyə, o, vurğulayıb.

Putin əlavə edib ki, axşamkı söhbət bugünkü görüş üçün əlverişli bünövrəyə çevrilib.

Rusiya lideri xatırladıb ki, münaqişənin həlli üçün beynəlxalq formatlar var:

“Şübhəsiz, biz bütün bu beynəlxalq formarla hörmətlə yanaşırıq və həmkarlarımızla işi davam etdirəcəyik”, - deyə, Putin vurğulayıb.

Onun sözlərinə görə, qarşılıqlı münasibətlərin zəngin tarixini nəzərə alaraq, ölkələr arasında ikitərəfli əlaqələri davam etdirmək lazımdır.

“İstənilən halda bütün bunlar çox faydalıdır və mən sizinlə görüşmək, bütün bu mövzularda danışmaq imkanından çox şadam”, - deyə, Putin sonda bildirib.

Ölkə.Az